المستدرك على الصحيحين

عبداللہ بن بریدہ سے مروی ہے کہ انہوں نے سیدنا ابو موسٰی اشعری رضی اللہ عنہ کا حلیہ بیان کرتے ہوئے فرمایا: وہ ہلکے جسم کے مالک، پستہ قد اور ہلکی داڑھی والے تھے۔

محمد بن عبداللہ بن نمیر سے روایت ہے کہ سیدنا ابو موسٰی اشعری رضی اللہ عنہ کی وفات سن 52 ہجری میں ہوئی، اس وقت ان کی عمر تریسٹھ سال تھی۔

یحییٰ بن معین سے مروی ہے کہ سیدنا ابو موسٰی اشعری رضی اللہ عنہ کا نام عبداللہ بن قیس ہے۔

سعید بن عبدالعزیز تنوخی سے روایت ہے کہ سیدنا ابوموسیٰ اشعری رضی اللہ عنہ نبی کریم ﷺ کی خدمت میں حاضر ہوئے، تو نبی کریم ﷺ نے کشتی والوں میں سے سب سے بڑے اور سب سے چھوٹے کے لیے دعا فرمائی، سیدنا ابوعامر اشعری رضی اللہ عنہ نے عرض کیا کہ میں کشتی والوں میں سب سے بڑا ہوں اور میرا بیٹا سب سے چھوٹا ہے، سعید کہتے ہیں کہ ان میں ابوعامر، ابو مالک، ابوموسیٰ اور کعب بن عاصم رضی اللہ عنہم شامل تھے، میرا خیال ہے کہ وہ مقامِ ابواء سے نکلے تھے۔