المستدرك على الصحيحين

نبی کریم ﷺ کے ایک اور صحابی سے اسی طرح کی روایت مروی ہے کہ آپ ﷺ نے فرمایا: ”عمار (کے رگ و ریشے اور) ہڈیوں کے جوڑوں تک ایمان بھرا ہوا ہے۔“

محمد بن علی ابن الحنفیہ سیدنا عمار بن یاسر رضی اللہ عنہ سے روایت کرتے ہیں کہ وہ رسول اللہ ﷺ کی خدمت میں حاضر ہوئے جبکہ آپ ﷺ کو بخار کی شدت تھی، تو رسول اللہ ﷺ نے ان سے فرمایا: ”کیا میں تمہیں وہ دعا نہ سکھاؤں جو جبریل (علیہ السلام) نے مجھے دم کرنے کے لیے سکھائی تھی؟“ میں نے عرض کیا: کیوں نہیں اے اللہ کے رسول! چنانچہ آپ ﷺ نے انہیں یہ دعا سکھائی: «بِاسْمِ اللَّهِ أَرْقِيكَ، وَاللَّهُ يَشْفِيكَ، مِنْ كُلِّ دَاءٍ يُؤْذِيكَ. خُذْهَا فَلْتَهْنِيكَ» ”اللہ کے نام سے میں تم پر دم کرتا ہوں، اور اللہ تمہیں ہر اس بیماری سے شفا دے گا جو تمہیں تکلیف پہنچاتی ہے، اسے لے لو یہ تمہارے لیے خوشگوار (باعثِ شفا) ہو“۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

سیدنا عمار بن یاسر رضی اللہ عنہ سے روایت ہے، انہوں نے کہا: میں نے نبی کریم ﷺ کو (اس حال میں) دیکھا کہ آپ ﷺ کے ساتھ (اسلام کے ابتدائی دور میں) صرف پانچ غلام، دو عورتیں اور سیدنا ابوبکر (رضی اللہ عنہم) تھے۔
یہ حدیث شیخین کی شرط پر صحیح ہے۔