المستدرك على الصحيحين

سیدنا عبداللہ بن عمر رضی اللہ عنہما سے روایت ہے کہ میں نے جنگ یمامہ کے دن سیدنا عمار بن یاسر رضی اللہ عنہ کو ایک چٹان پر دیکھا، وہ بلندی سے پکار رہے تھے: ”اے گروہِ مسلمین! کیا تم جنت سے بھاگ رہے ہو؟ میں عمار بن یاسر ہوں، کیا تم جنت سے بھاگ رہے ہو؟ میں عمار بن یاسر ہوں، میری طرف آؤ“، میں دیکھ رہا تھا کہ ان کا ایک کان کٹ چکا تھا اور وہ لٹک رہا تھا جبکہ وہ انتہائی سخت قتال کر رہے تھے۔

سیدنا عمار بن یاسر رضی اللہ عنہ کی صاحبزادی ام حکم کی لونڈی لؤلؤہ سے روایت ہے کہ جس دن سیدنا عمار بن یاسر رضی اللہ عنہ شہید ہوئے اس دن جھنڈا ابو ہاشم بن عتبہ نے تھام رکھا تھا، اس دن عصر تک سیدنا علی رضی اللہ عنہ کے بہت سے ساتھی شہید ہو چکے تھے، پھر سیدنا عمار آگے بڑھے اور دیکھا کہ ابو ہاشم ان سے بھی آگے ہیں، اس وقت سورج غروب ہونے کے قریب تھا اور سیدنا عمار رضی اللہ عنہ کے پاس پانی ملا ہوا دودھ (ضیح) تھا اور وہ روزہ افطار کرنے کے لیے سورج ڈوبنے کا انتظار کر رہے تھے، چنانچہ جیسے ہی سورج غروب ہوا انہوں نے وہ دودھ پیا اور فرمایا: میں نے رسول اللہ ﷺ کو فرماتے ہوئے سنا ہے: «آخِرُ زَادِكَ مِنَ الدُّنْيَا ضَيْحٌ مِنْ لَبَنٍ» ”دنیا میں تمہارا آخری زادِ راہ دودھ کا ایک گھونٹ ہوگا“، راویہ کہتی ہیں: پھر وہ آگے بڑھے اور قتال کیا یہاں تک کہ شہید ہو گئے، اس وقت ان کی عمر چورانوے برس تھی۔