المستدرك على الصحيحين

قیس بن عباد بیان کرتے ہیں کہ میں مدینہ منورہ میں حاضر تھا، جب نماز کے لیے اقامت کہی گئی تو میں آگے بڑھ کر پہلی صف میں کھڑا ہو گیا، سیدنا عمر بن خطاب رضی اللہ عنہ تشریف لائے، صفوں کو چیرتے ہوئے آگے بڑھے، ان کے ساتھ ایک گندمی رنگت اور ہلکی داڑھی والے شخص (سیدنا ابی بن کعب) بھی نکلے، انہوں نے لوگوں کے چہروں کی طرف دیکھا، جب انہوں نے مجھے دیکھا تو مجھے پیچھے ہٹا کر میری جگہ کھڑے ہو گئے، مجھے یہ بات بہت گراں گزری، جب نماز سے فارغ ہوئے تو میری طرف متوجہ ہو کر فرمایا: ”(اے نوجوان!) تم برا نہ ماننا اور نہ غمگین ہونا، کیا تمہیں یہ بات گراں گزری ہے؟ اصل میں میں نے رسول اللہ ﷺ کو فرماتے ہوئے سنا ہے: ”پہلی صف میں صرف مہاجرین اور انصار ہی کھڑے ہوں۔“ میں نے پوچھا: یہ کون صاحب ہیں؟ لوگوں نے بتایا: یہ سیدنا ابی بن کعب رضی اللہ عنہ ہیں۔
یہ حدیث صحیح الاسناد ہے اور اسے قتادہ سے روایت کرنے میں حکم بن عبد الملک منفرد ہیں۔

سیدنا ابی بن کعب رضی اللہ عنہ سے روایت ہے کہ رسول اللہ ﷺ نے ارشاد فرمایا: ”مجھ پر ایک سورت نازل ہوئی ہے اور مجھے حکم دیا گیا ہے کہ میں تمہیں وہ پڑھ کر سناؤں۔“ میں نے عرض کی: کیا (اللہ کی جانب سے) میرا نام لیا گیا ہے؟ آپ ﷺ نے فرمایا: ”ہاں۔“ (راوی کہتے ہیں) میں نے ابی بن کعب سے پوچھا: اے ابو المنذر! کیا آپ کو اس بات سے خوشی ہوئی؟ انہوں نے فرمایا: مجھے خوش ہونے سے کون سی چیز روک سکتی ہے جبکہ اللہ تبارک و تعالیٰ کا فرمان ہے ﴿قُلْ بِفَضْلِ اللَّهِ وَبِرَحْمَتِهِ فَبِذَلِكَ فَلْيَفْرَحُوا﴾ ”آپ فرما دیجیے کہ یہ اللہ کے فضل اور اس کی رحمت سے ہے، پس چاہیے کہ وہ اس پر خوشیاں منائیں۔“ [سورة يونس: 58]
یہ حدیث صحیح الاسناد ہے لیکن شیخین نے اسے روایت نہیں کیا۔

عکرمہ بن سلیمان بیان کرتے ہیں کہ میں نے اسماعیل بن عبد اللہ بن قسطنطین کے پاس قرآن پڑھا، جب میں سورت ﴿وَالضُّحَى﴾ پر پہنچا تو انہوں نے مجھ سے فرمایا: ہر سورت کے ختم پر تکبیر (اللہ اکبر) کہا کرو یہاں تک کہ تم قرآن مکمل کر لو، کیونکہ میں نے عبد اللہ بن کثیر کے پاس قرآن پڑھا تھا، جب میں سورت ﴿وَالضُّحَى﴾ پر پہنچا تو انہوں نے قرآن مکمل ہونے تک تکبیر کہی، اور عبد اللہ بن کثیر نے بتایا کہ انہوں نے مجاہد کے پاس پڑھا تھا تو انہوں نے انہیں یہی حکم دیا تھا، مجاہد نے بتایا کہ سیدنا ابن عباس رضی اللہ عنہما نے انہیں ایسا ہی کرنے کا حکم دیا تھا، ابن عباس رضی اللہ عنہما نے بتایا کہ سیدنا ابی بن کعب رضی اللہ عنہ نے انہیں اس کا حکم دیا تھا اور ابی بن کعب نے بتایا کہ نبی کریم ﷺ نے انہیں اس بات کا حکم دیا تھا۔
یہ حدیث صحیح الاسناد ہے لیکن شیخین نے اسے روایت نہیں کیا۔