المستدرك على الصحيحين

محمد بن عمر واقدی اپنے شیوخ سے روایت کرتے ہیں کہ عیاض بن غنم بن زہیر (پورا نسب ذکر کیا) صلح حدیبیہ سے پہلے اسلام لائے اور رسول اللہ ﷺ کے ساتھ حدیبیہ میں شریک ہوئے، ان کے نکاح میں ابو سفیان بن حرب کی صاحبزادی ام حکم تھیں، جب سیدنا ابو عبیدہ بن جراح رضی اللہ عنہ کی وفات کا وقت قریب آیا تو انہوں نے عیاض کو اپنا نائب مقرر کیا، عیاض ایک انتہائی نیک انسان تھے، جب سیدنا عمر رضی اللہ عنہ کو ابو عبیدہ کی وفات کی خبر ملی تو انہوں نے کثرت سے کلمہ استرجاع پڑھا اور فرمایا: ”تمہاری جگہ کوئی دوسرا پُر نہیں کر سکتا“، پھر انہوں نے پوچھا کہ ابو عبیدہ نے اپنا نائب کسے بنایا ہے؟ بتایا گیا کہ عیاض بن غنم کو، تو عمر رضی اللہ عنہ نے انہیں برقرار رکھا اور لکھا: ”میں نے تمہیں ان علاقوں کا والی مقرر کیا ہے جن کے ابو عبیدہ بن جراح والی تھے، لہٰذا تم وہی کام کرنا جو اللہ کے نزدیک برحق ہے“، چنانچہ عیاض کی وفات اس حال میں ہوئی کہ ان کے پاس نہ تو کوئی مال تھا اور نہ ہی ان پر کسی کا قرض، ان کی وفات سنہ 20 ہجری میں شام میں ہوئی اور اس وقت ان کی عمر ساٹھ برس تھی۔

خلیفہ بن خیاط بیان کرتے ہیں کہ عیاض بن غنم رضی اللہ عنہ کی وفات سنہ 20 ہجری میں ہوئی۔