المستدرك على الصحيحين

سیدنا سعد بن ابی وقاص رضی اللہ عنہ سے روایت ہے کہ جب رسول اللہ ﷺ پر وحی نازل ہوئی تو آپ ﷺ نے سیدنا علی، سیدہ فاطمہ رضی اللہ عنہما اور ان کے دونوں صاحبزادوں کو اپنی چادر کے نیچے لے لیا اور پھر دعا فرمائی: «اللَّهُمَّ هَؤُلَاءِ أَهْلِي وَأَهْلُ بَيْتِي» ”اے اللہ! یہ میرے اپنے اور میرے اہل بیت ہیں۔“

سیدنا عبداللہ بن جعفر رضی اللہ عنہ سے روایت ہے، وہ کہتے ہیں کہ جب رسول اللہ ﷺ نے دیکھا کہ رحمت نازل ہو رہی ہے تو آپ ﷺ نے فرمایا: ”انہیں میرے پاس بلاؤ، انہیں میرے پاس بلاؤ،“ سیدہ صفیہ رضی اللہ عنہا نے پوچھا: اے اللہ کے رسول! کن کو بلاؤں؟ آپ ﷺ نے فرمایا: ”میرے اہل بیت یعنی علی، فاطمہ، حسن اور حسین کو،“ چنانچہ وہ انہیں لے آئیں، پھر نبی کریم ﷺ نے اپنی چادر ان پر ڈال دی، پھر اپنے ہاتھ اٹھا کر دعا فرمائی: «اللَّهُمَّ هَؤُلَاءِ آلي، فَصَلِّ عَلَى مُحَمَّدٍ وَعَلَى آلِ مُحَمَّدٍ» ”اے اللہ! یہ میری آل ہیں، پس تو محمد اور آلِ محمد پر اپنی رحمتیں نازل فرما،“ اور اللہ عزوجل نے یہ آیت نازل فرمائی: ﴿إِنَّمَا يُرِيدُ اللَّهُ لِيُذْهِبَ عَنْكُمُ الرِّجْسَ أَهْلَ الْبَيْتِ وَيُطَهِّرَكُمْ تَطْهِيرًا﴾ ”اللہ تو یہی چاہتا ہے کہ اے نبی کے گھر والو! تم سے ناپاکی دور کر دے اور تمہیں پوری طرح پاک کر دے۔“ [سورة الأحزاب: 33]
یہ حدیث صحیح الاسناد ہے لیکن شیخین نے اسے روایت نہیں کیا، جبکہ امام بخاری اور امام مسلم کی شرط پر یہ روایت صحیح ثابت ہے کہ آپ ﷺ نے صحابہ کو اپنے اہل بیت پر درود پڑھنا اسی طرح سکھایا جس طرح اپنی آل پر درود سکھایا تھا۔