المستدرك على الصحيحين

سیدنا سعد بن ابی وقاص رضی اللہ عنہ سے روایت ہے، انہوں نے کہا: جب مکہ کی فتح کا دن تھا تو عبداللہ بن سعد بن ابی سرح، سیدنا عثمان بن عفان رضی اللہ عنہ کے پاس چھپ گیا، پھر سیدنا عثمان اسے لے کر آئے اور اسے نبی کریم ﷺ کے سامنے کھڑا کر دیا اور عرض کی: اے اللہ کے رسول! عبداللہ سے بیعت لے لیجیے، آپ ﷺ نے اپنا سر اٹھایا اور تین بار اس کی طرف دیکھا، پھر اپنے صحابہ کی طرف متوجہ ہو کر فرمایا: ”کیا تم میں کوئی سمجھدار آدمی ایسا نہ تھا جو اس وقت کھڑا ہوتا جب اس نے دیکھا کہ میں نے اس سے بیعت لینے کے لیے اپنا ہاتھ روک لیا ہے، اور اسے قتل کر دیتا؟“ صحابہ نے عرض کی: اے اللہ کے رسول! ہمیں نہیں معلوم تھا کہ آپ کے دل میں کیا ہے، آپ نے ہمیں اپنی آنکھ سے اشارہ کیوں نہ کر دیا؟ آپ ﷺ نے فرمایا: ”کسی نبی کے لیے یہ لائق نہیں ہے کہ اس کی آنکھیں خائن یعنی اشارہ کرنے والی ہوں“۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

سیدنا عبداللہ بن عباس رضی اللہ عنہما سے روایت ہے، انہوں نے کہا: عبداللہ بن ابی سرح رسول اللہ ﷺ کے لیے (وحی) لکھا کرتے تھے، پھر شیطان نے انہیں لغزش میں مبتلا کر دیا اور وہ کافروں سے جا ملے، تو رسول اللہ ﷺ نے انہیں قتل کرنے کا حکم دیا، پھر سیدنا عثمان رضی اللہ عنہ نے ان کے لیے پناہ طلب کی تو رسول اللہ ﷺ نے انہیں پناہ دے دی۔
یہ حدیث امام بخاری کی شرط پر صحیح ہے لیکن شیخین نے اسے روایت نہیں کیا۔

شرحبیل بن سعد سے روایت ہے، انہوں نے کہا: عبداللہ بن ابی سرح کے متعلق یہ آیت نازل ہوئی: ﴿وَمَنْ أَظْلَمُ مِمَّنِ افْتَرَى عَلَى اللَّهِ كَذِبًا أَوْ قَالَ أُوحِيَ إِلَيَّ وَلَمْ يُوحَ إِلَيْهِ شَيْءٌ وَمَنْ قَالَ سَأُنْزِلُ مِثْلَ مَا أَنْزَلَ اللَّهُ﴾ ”اور اس شخص سے بڑا ظالم کون ہوگا جو اللہ پر جھوٹ بہتان باندھے یا یہ کہے کہ میری طرف وحی کی گئی ہے حالانکہ اس کی طرف کچھ بھی وحی نہ کی گئی ہو، اور جو یہ کہے کہ میں بھی ویسا ہی کلام نازل کر دوں گا جیسا اللہ نے نازل کیا ہے“ [سورة الأنعام: 93]، پھر جب رسول اللہ ﷺ مکہ میں داخل ہوئے تو وہ سیدنا عثمان بن عفان رضی اللہ عنہ کی طرف بھاگ گیا، وہ ان کے رضاعی بھائی تھے، انہوں نے اسے اپنے پاس چھپائے رکھا یہاں تک کہ اہل مکہ کو اطمینان ہو گیا، پھر وہ اسے رسول اللہ ﷺ کے پاس لے آئے اور انہوں نے امان طلب کی۔
امام حاکم فرماتے ہیں: دونوں کتابوں (بخاری و مسلم) میں یہ روایت صحیح ثابت ہے کہ رسول اللہ ﷺ نے مکہ میں داخل ہونے سے پہلے عبداللہ بن سعد اور عبداللہ بن خطل کو قتل کرنے کا حکم دیا تھا، پس جو شخص امیر المؤمنین عثمان بن عفان رضی اللہ عنہ کی شہادت اور مصر میں عبداللہ بن سعد کی ان کے خلاف کی گئی زیادتیوں پر نظر ڈالے گا یہاں تک کہ ان کا جو انجام ہوا سو ہوا، وہ جان لے گا کہ نبی کریم ﷺ ان (کے شر) سے سب سے زیادہ واقف تھے۔