المستدرك على الصحيحين

سیدنا انس رضی اللہ عنہ سے روایت ہے کہ رسول اللہ ﷺ نے فرمایا: ”جب اللہ تعالیٰ نے آدم (علیہ السلام) کی صورت بنائی تو انہیں (کچھ دیر کے لیے) چھوڑ دیا، تو ابلیس ان کے گرد گھومنے لگا اور انہیں دیکھنے لگا، جب اس نے دیکھا کہ یہ تو اندر سے کھوکھلے ہیں تو اس نے کہا: میں نے اس پر قابو پا لیا ہے، یہ ایسی مخلوق ہے جو اپنے آپ پر قابو نہیں رکھ سکتی۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

سیدنا عبداللہ بن عباس رضی اللہ عنہما سے روایت ہے، انہوں نے فرمایا: ”آدم علیہ السلام کو جنت میں صرف نمازِ عصر سے لے کر سورج غروب ہونے تک کے درمیانی وقت کے برابر ٹھہرایا گیا تھا۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔

سیدنا عبداللہ بن عباس رضی اللہ عنہما سے روایت ہے، انہوں نے فرمایا: ”اللہ تعالیٰ نے آدم علیہ السلام کو سب سے پہلے ہندوستان کی زمین پر اتارا تھا۔“
اس حدیث کی سند صحیح ہے لیکن شیخین نے اسے روایت نہیں کیا۔