المستدرك على الصحيحين

سیدنا ابو مسعود انصاری رضی اللہ عنہ سے روایت ہے کہ نبی کریم ﷺ نے فرمایا: ”جمعہ کے دن مجھ پر کثرت سے درود بھیجا کرو، کیونکہ جمعہ کے دن جو بھی مجھ پر درود بھیجتا ہے اس کا درود میرے سامنے پیش کیا جاتا ہے۔“
یہ حدیث صحیح الاسناد ہے (کیونکہ ابورافع سے مراد اسماعیل بن رافع ہیں) لیکن شیخین نے اسے روایت نہیں کیا۔

سیدنا ابی بن کعب رضی اللہ عنہ سے روایت ہے کہ جب رات کا چوتھائی حصہ گزر جاتا تو رسول اللہ ﷺ کھڑے ہوتے اور فرماتے: ”اے لوگو! اللہ کو یاد کرو، اے لوگو! اللہ کو یاد کرو، کپکپا دینے والی (قیامت) آ پہنچی ہے جس کے پیچھے پیچھے دوسری آنے والی ہے، موت اپنی سختیوں کے ساتھ آ پہنچی ہے، موت اپنی سختیوں کے ساتھ آ پہنچی ہے۔“ ابی بن کعب رضی اللہ عنہ نے عرض کیا: یا رسول اللہ! میں آپ پر کثرت سے درود بھیجتا ہوں، میں اپنی دعا میں سے کتنا حصہ آپ کے لیے (درود کے لیے) مقرر کروں؟ آپ ﷺ نے فرمایا: ”جتنا تم چاہو،“ میں نے کہا: چوتھائی؟ آپ ﷺ نے فرمایا: ”جتنا چاہو، لیکن اگر اس سے زیادہ کرو تو وہ تمہارے لیے بہتر ہے،“ میں نے کہا: آدھا؟ آپ ﷺ نے فرمایا: ”جتنا چاہو، لیکن اگر اس سے زیادہ کرو تو وہ تمہارے لیے بہتر ہے،“ میں نے کہا: دو تہائی؟ آپ ﷺ نے فرمایا: ”جتنا چاہو، لیکن اگر اس سے زیادہ کرو تو وہ تمہارے لیے بہتر ہے،“ میں نے عرض کیا: یا رسول اللہ! میں اپنی پوری دعا آپ کے لیے (درود کے لیے) مقرر کرتا ہوں؟ آپ ﷺ نے فرمایا: ”تب تمہاری پریشانیوں کے لیے کافی ہو جائے گا اور تمہارے گناہ بخش دیے جائیں گے۔“
یہ حدیث صحیح الاسناد ہے لیکن شیخین نے اسے روایت نہیں کیا۔