المستدرك على الصحيحين

سیدنا ابوذر رضی اللہ عنہ سے روایت ہے کہ انہوں نے کعبہ کا دروازہ پکڑ کر بلند آواز میں کہا: اے لوگو! جو مجھے پہچانتا ہے وہ تو جانتا ہی ہے اور جو مجھے نہیں پہچانتا وہ جان لے کہ میں ابوذر ہوں، میں نے رسول اللہ ﷺ کو یہ فرماتے ہوئے سنا: ”میرے اہل بیت کی مثال نوح علیہ السلام کی کشتی کی سی ہے، جو اس میں سوار ہو گیا وہ نجات پا گیا اور جو اس سے پیچھے رہ گیا وہ غرق ہو گیا“۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

سیدنا عبداللہ بن عباس رضی اللہ عنہما سے روایت ہے کہ رسول اللہ ﷺ ”وادی ازرق“ سے گزرے تو دریافت فرمایا: ”یہ کون سی وادی ہے؟“ صحابہ نے عرض کیا: یہ وادی ازرق ہے، آپ ﷺ نے فرمایا: ”گویا میں سیدنا موسیٰ بن عمران علیہ السلام کو دیکھ رہا ہوں کہ وہ اس وادی سے نیچے اتر رہے ہیں اور بلند آواز سے اللہ کے حضور تکبیر (اللہ اکبر) پکار رہے ہیں“، پھر آپ ﷺ ایک گھاٹی پر پہنچے تو پوچھا: ”یہ کون سی گھاٹی ہے؟“ لوگوں نے بتایا کہ یہ فلاں فلاں گھاٹی ہے، آپ ﷺ نے فرمایا: ”گویا میں یونس بن متی علیہ السلام کو ایک سرخ رنگ کی توانا اونٹنی پر سوار دیکھ رہا ہوں، جس کی مہار کھجور کے ریشوں سے بنی ہوئی ہے، وہ اون کا جبہ پہنے ہوئے ہیں اور (لبیک اللھم لبیک پکارتے ہوئے) تلبیہ کہہ رہے ہیں“۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

سیدنا عبداللہ بن عباس رضی اللہ عنہما سے روایت ہے کہ سیدنا ابوبکر صدیق رضی اللہ عنہ نے عرض کیا: اے اللہ کے رسول! میں دیکھ رہا ہوں کہ آپ پر بڑھاپے کے اثرات (بالوں کی سفیدی) آ گئے ہیں، آپ ﷺ نے فرمایا: ”مجھے سورہ ہود، سورہ واقعہ، سورہ عم يتساءلون اور سورہ اذا الشمس كورت (کے ہولناک مضامین) نے بوڑھا کر دیا ہے“۔
یہ حدیث امام بخاری کی شرط پر صحیح ہے لیکن شیخین نے اسے روایت نہیں کیا۔