المستدرك على الصحيحين

سیدہ عائشہ رضی اللہ عنہا سے روایت ہے کہ رسول اللہ ﷺ نے فرمایا: ”اگر اللہ تعالیٰ قومِ نوح میں سے کسی پر رحم فرماتا تو اس بچے کی ماں پر رحم فرماتا“، پھر آپ ﷺ نے (واقعہ بیان کرتے ہوئے) فرمایا: ”سیدنا نوح علیہ السلام اپنی قوم میں پچاس کم ایک ہزار سال (ساڑھے نو سو سال) تک مقیم رہے اور انہیں دعوتِ حق دیتے رہے، یہاں تک کہ اپنے آخری وقت میں انہوں نے ایک درخت لگایا، جب وہ بہت بڑا اور تناور ہو گیا تو انہوں نے اسے کاٹ کر اس سے کشتی بنانی شروع کی، لوگ وہاں سے گزرتے ہوئے ان سے (حیرت سے) پوچھتے تو وہ فرماتے: میں کشتی بنا رہا ہوں، جس پر وہ ان کا مذاق اڑاتے اور کہتے: کیا تم خشکی پر کشتی بنا رہے ہو؟! یہ چلے گی کیسے؟ انہوں نے فرمایا: تم عنقریب جان لو گے، پھر جب وہ اس کی تیاری سے فارغ ہوئے تو تنور ابل پڑا ﴿وَفَارَ التَّنُّورُ﴾ اور گلیوں میں پانی کی کثرت ہو گئی، اس بچے کی ماں کو اس کی جان کی فکر لاحق ہوئی کیونکہ وہ اس سے بے پناہ محبت کرتی تھی، چنانچہ وہ اسے لے کر پہاڑ کی طرف نکل گئی یہاں تک کہ اس کے تہائی حصے تک جا پہنچی، پھر جب پانی وہاں تک پہنچ گیا تو وہ اسے لے کر مزید اوپر چلی گئی یہاں تک کہ پہاڑ کی چوٹی پر جا کھڑی ہوئی، پھر جب پانی اس کی گردن تک پہنچ گیا تو اس نے بچے کو اپنے ہاتھوں سے (ڈوبنے سے بچانے کے لیے) اوپر اٹھا لیا یہاں تک کہ پانی ان دونوں کو بہا لے گیا، پس اگر اللہ ان میں سے کسی پر رحم فرماتا تو اس بچے کی ماں پر رحم فرماتا“۔ [سورة هود: 40]
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا عبداللہ بن عباس رضی اللہ عنہما سے روایت ہے، انہوں نے فرمایا: سیدنا نوح علیہ السلام (کی بعثت) اور ان کی قوم کی ہلاکت کے درمیان تین سو سال کا فاصلہ تھا، اور وہ تنور (جس سے پانی ابلنا شروع ہوا تھا) ہند کی زمین میں تھا، اور سیدنا نوح علیہ السلام کی کشتی نے بیت اللہ (کعبہ) کا ایک ہفتہ (سات بار) طواف کیا تھا۔
یہ حدیث صحیح الاسناد ہے لیکن شیخین نے اسے روایت نہیں کیا۔