المستدرك على الصحيحين

سیدنا جابر بن عبداللہ رضی اللہ عنہما سے روایت ہے کہ رسول اللہ ﷺ نے فرمایا: ”جب کوئی غلام اپنے آقا کی اجازت کے بغیر نکاح کر لیتا ہے تو وہ بدکار (عاہر) ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا بریدہ رضی اللہ عنہ سے روایت ہے کہ رسول اللہ ﷺ نے سیدنا علی رضی اللہ عنہ سے فرمایا: ”اے علی! ایک نظر کے پیچھے دوسری نظر نہ ڈالنا، کیونکہ پہلی نظر تو تمہارے لیے (معاف) ہے لیکن دوسری نظر کا تمہیں حق نہیں ہے۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

سیدنا ابودرداء رضی اللہ عنہ سے روایت ہے کہ رسول اللہ ﷺ ایک غزوے میں تھے، آپ ﷺ نے ایک ایسی عورت کو دیکھا جو حاملہ (بچہ جننے کے قریب) تھی، آپ ﷺ نے دریافت فرمایا: ”شاید اس کے مالک نے اس سے قربت کی ہے؟“ لوگوں نے عرض کیا: جی ہاں، آپ ﷺ نے فرمایا: ”میرا ارادہ ہوا کہ میں اس پر ایسی لعنت کروں جو اس کے ساتھ اس کی قبر میں داخل ہو، وہ اسے (اپنی جائیداد کا) وارث کیسے بنائے گا حالانکہ وہ اس کے لیے حلال نہیں، اور وہ اس سے خدمت کیسے لے گا حالانکہ وہ اس کے لیے حلال نہیں (یعنی عدتِ استبراء سے پہلے قربت کی وجہ سے پیدا ہونے والے بچے کے نسب میں شبہ پیدا ہو گیا)۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔

سیدنا ابوسعید خدری رضی اللہ عنہ سے روایت ہے کہ انہوں نے غزوہ اوطاس کی قیدی عورتوں کے بارے میں مرفوعاً بیان کیا کہ آپ ﷺ نے فرمایا: ”کسی حاملہ عورت سے اس وقت تک قربت نہ کی جائے جب تک وہ بچہ نہ جن دے، اور جو حاملہ نہ ہو اس سے تب تک (قربت نہ کی جائے) جب تک اسے ایک حیض نہ آ جائے (تاکہ رحم کے خالی ہونے کا یقین ہو جائے)۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔