المستدرك على الصحيحين

سیدنا ایوب بن خالد انصاری اپنے دادا سے روایت کرتے ہیں کہ رسول اللہ ﷺ نے فرمایا: ”نکاح کا پیغام پوشیدہ رکھو، پھر وضو کرو اور اچھی طرح وضو کرو، پھر اتنی نماز پڑھو جتنی اللہ نے تمہارے لیے لکھ دی ہے، پھر اپنے رب کی حمد و ثنا بیان کرو اور کہو: «اللَّهُمَّ إِنَّكَ تَقْدِرُ وَلَا أَقْدِرُ، وَتَعْلَمُ وَلَا أَعْلَمُ، وَأَنْتَ عَلَّامُ الْغُيُوبِ، فَإِنْ رَأَيْتَ لِي فِي فُلَانَةَ -يُسمِّيها باسمِها- خَيْرًا لِي فِي دِينِي وَدُنْيَايَ وَآخِرَتِي، فَاقْدُرْهَا لِي، فَإِنْ كَانَ غَيْرُهَا خَيْرًا لِي فِي دِينِي وَدُنْيَايَ وَآخِرَتِي، فَاقْدُرْهَا لِي» ”اے اللہ! تو قدرت رکھتا ہے اور میں قدرت نہیں رکھتا، تو جانتا ہے اور میں نہیں جانتا، تو غیبوں کا خوب جاننے والا ہے، اگر تو میرے لیے فلاں عورت میں ۔ اس کا نام لے ۔ میرے دین، دنیا اور آخرت کے حوالے سے بھلائی دیکھتا ہے تو اسے میرے نصیب میں کر دے، اور اگر اس کے علاوہ کوئی اور میرے دین، دنیا اور آخرت کے لیے بہتر ہے تو اسے میرے لیے مقدر فرما دے۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا انس رضی اللہ عنہ سے روایت ہے کہ نبی کریم ﷺ نے ایک عورت سے نکاح کا ارادہ فرمایا تو ایک خاتون کو انہیں دیکھنے کے لیے بھیجا اور فرمایا: ”اس کے منہ کی بو سونگھو اور اس کی پنڈلیوں کو دیکھو“ وہ خاتون ان کے پاس گئیں تو انہوں نے کہا: اے امِ فلاں! کیا ہم آپ کو صبح کا کھانا نہ کھلائیں؟ انہوں نے کہا: میں صرف وہی کھانا کھاؤں گی جو فلاں (لڑکی) لے کر آئے گی، راوی کہتے ہیں: وہ ان کے چھجے پر چڑھ گئیں اور اس کی پنڈلیاں دیکھیں، پھر کہا: بیٹی! میرے سر سے جوئیں نکال دو، پس وہ جوئیں نکالنے لگی اور وہ خاتون اس کے منہ کی بو سونگھتی رہیں، پھر انہوں نے آ کر (نبی کریم ﷺ کو) خبر دی۔
یہ حدیث امام مسلم کی شرط پر صحیح ہے لیکن انہوں نے اسے روایت نہیں کیا۔