المستدرك على الصحيحين

سیدنا جابر رضی اللہ عنہ سے روایت ہے کہ رسول اللہ ﷺ نے فرمایا: ”ہر نیک کام صدقہ ہے، اور جو کچھ آدمی اپنی ذات اور اپنے اہل و عیال پر خرچ کرتا ہے وہ اس کے لیے صدقہ لکھا جاتا ہے، اور جس چیز کے ذریعے انسان اپنی عزت و آبرو کی حفاظت کرے وہ بھی اس کے لیے صدقہ لکھی جاتی ہے، اور مومن جو کچھ بھی خرچ کرے اللہ تعالیٰ اس کا نعم البدل عطا فرمانے والا اور ضامن ہے، سوائے اس خرچ کے جو کسی عمارت کی تعمیر یا گناہ کے کام میں کیا گیا ہو۔“ راوی کہتے ہیں کہ میں نے محمد بن منکدر سے پوچھا: ”آدمی اپنی عزت کی حفاظت کس طرح کرتا ہے؟“ انہوں نے جواب دیا: ”جو وہ (کسی کی زبان بند کرنے کے لیے) شاعر یا کسی بدزبان شخص کو دیتا ہے (تاکہ اس کی آبرو محفوظ رہے)۔“
یہ حدیث صحیح ہے لیکن شیخین نے اسے روایت نہیں کیا۔

سیدنا انس بن مالک رضی اللہ عنہ سے روایت ہے کہ رسول اللہ ﷺ نے فرمایا: ”تم میں سے جو شخص اپنے مال کے ذریعے اپنے دین اور اپنی عزت کی حفاظت کر سکتا ہو، اسے ایسا ضرور کرنا چاہیے۔“

سیدنا ابوہریرہ رضی اللہ عنہ سے روایت ہے کہ رسول اللہ ﷺ نے فرمایا: ”مسلمانوں کے درمیان صلح کرانا جائز ہے۔“
یہ حدیث شیخین کی شرط پر صحیح ہے اور یہ عبداللہ بن حسین مصیصی سے معروف ہے جو کہ ثقہ راوی ہیں۔