المستدرك على الصحيحين

سیدنا عقبہ بن عامر رضی اللہ عنہ سے روایت ہے کہ رسول اللہ ﷺ نے فرمایا: ”غلام کی واپسی کا اختیار چار راتیں ہے۔“
یہ حدیث صحیح الاسناد ہے لیکن مرسل ہے، کیونکہ امام حسن بصری نے سیدنا عقبہ بن عامر رضی اللہ عنہ سے نہیں سنا، اور اس کا ایک شاہد بھی موجود ہے۔

سیدنا عبداللہ بن عمر رضی اللہ عنہما سے روایت ہے کہ حبان بن منقذ رضی اللہ عنہ ایک کمزور شخص تھے اور ان کے سر پر ایک ایسا گہرا زخم لگا تھا جو دماغ کی جھلی تک پہنچ گیا تھا، تو رسول اللہ ﷺ نے ان کے لیے کسی بھی چیز کی خریداری میں تین دن کا اختیار مقرر فرما دیا تھا، ان کی زبان میں لکنت تھی تو رسول اللہ ﷺ نے ان سے فرمایا: ”تم سودا کرو تو کہہ دیا کرو: «لَا خِلَابَةَ» ”کوئی دھوکہ دہی نہیں ہے۔““ راوی بیان کرتے ہیں کہ میں انہیں (زبان کی لکنت کی وجہ سے) «لَا خِذَابَةَ لَا خِذَابَةَ» کہتے ہوئے سنتا تھا۔ وہ کوئی چیز خرید کر اپنے گھر والوں کے پاس لاتے اور وہ کہتے کہ یہ تو مہنگی ہے، تو وہ جواب دیتے کہ رسول اللہ ﷺ نے مجھے میری بیع میں (واپسی کا) اختیار دیا ہے۔