المستدرك على الصحيحين

سیدنا عبداللہ بن مسعود رضی اللہ عنہ سے روایت ہے کہ رسول اللہ ﷺ نے فرمایا: ”اس قرآن کی تلاوت کا اہتمام کرتے رہو، کیونکہ یہ (سینوں سے) نکل جانے والا ہے؛ یہ لوگوں کے سینوں سے اتنی تیزی سے نکل جاتا ہے جتنا اونٹ اپنی رسیوں سے نکل بھاگتا ہے، اور تم میں سے کوئی ہرگز یہ نہ کہے کہ میں فلاں فلاں آیت بھول گیا ہوں، بلکہ (یوں کہے کہ) اسے بھلا دیا گیا ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا اسید بن حضیر رضی اللہ عنہ سے روایت ہے کہ وہ اپنے گھر کی چھت پر تلاوت کر رہے تھے اور ان کی آواز بہت خوبصورت تھی، وہ رسول اللہ ﷺ کی خدمت میں حاضر ہوئے اور عرض کیا: میں تلاوت کر رہا تھا کہ اچانک ایک بادل جیسی چیز نے مجھے ڈھانپ لیا، گھر میں اہلیہ تھیں اور صحن میں گھوڑا بندھا تھا، مجھے ڈر لگا کہ کہیں (گھوڑے کے بدکنے سے) اہلیہ کو چوٹ نہ لگ جائے یا گھوڑا چھوٹ نہ جائے، اس لیے میں نے تلاوت چھوڑ دی، رسول اللہ ﷺ نے ان سے فرمایا: ”اے اسید! پڑھتے رہتے، کیونکہ وہ تو فرشتے تھے جو قرآن سننے کے لیے آئے تھے۔“

سیدنا اسید بن حضیر رضی اللہ عنہ سے روایت ہے کہ وہ نبی کریم ﷺ کے پاس آئے، پھر انہوں نے اسی طرح کی حدیث ذکر کی جس میں ہے کہ رسول اللہ ﷺ نے فرمایا: ”اے اسید! پڑھتے رہتے، اے اسید! پڑھتے رہتے، کیونکہ وہ فرشتے تھے جو قرآن سن رہے تھے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔