المستدرك على الصحيحين

سیدنا عمر رضی اللہ عنہ سے روایت ہے کہ نبی کریم ﷺ پانچ چیزوں سے پناہ مانگا کرتے تھے: بزدلی سے، بخل سے، عمر کی خرابی (انتہائی نکمی عمر) سے، قبر کے عذاب سے اور سینے کے فتنے (بدگمانی و کینہ) سے۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔

سیدنا انس بن مالک رضی اللہ عنہ سے روایت ہے کہ رسول اللہ ﷺ اپنی دعا میں فرمایا کرتے تھے: «اللَّهُمَّ إِنِّي أَعُوذُ بِكَ مِنَ الْعَجْزِ وَالْكَسَلِ، وَالْجُبْنِ وَالْبُخْلِ، وَالْهَرَمِ وَالْقَسْوَةِ، وَالْغَفْلَةِ وَالْعَيْلَةِ، وَالذِّلَّةِ وَالْمَسْكَنَةِ، وَأَعُوذُ بِكَ مِنَ الْفَقْرِ وَالْكُفْرِ، وَالْفُسُوقِ وَالشِّقَاقِ وَالنِّفَاقِ وَالسُّمْعَةِ وَالرِّيَاء، وَأَعُوذُ بِكَ مِنَ الصَّمَمِ وَالْبَكَمِ وَالْجُنُونِ، وَالْجُذَامِ وَالْبَرَصِ، وَسَيِّئِ الْأَسْقَامِ» ”اے اللہ! میں عاجزی، سستی، بزدلی، بخل، انتہائی بڑھاپے، سنگدلی، غفلت، تنگدستی، ذلت اور محتاجی سے تیری پناہ مانگتا ہوں، اور میں فقر، کفر، گناہ و نافرمانی، نااتفاقی، نفاق، شہرت پسندی اور دکھاوے سے تیری پناہ مانگتا ہوں، اور میں بہرے پن، گونگے پن، دیوانگی، کوڑھ، برص اور تمام بری بیماریوں سے تیری پناہ مانگتا ہوں“۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔