المستدرك على الصحيحين

سیدنا ابومالک اشجعی اپنے والد سے روایت کرتے ہیں کہ رسول اللہ ﷺ اسلام لانے والے شخص کو یہ دعا سکھایا کرتے تھے: «اللَّهُمَّ اهْدِنِي وَارْزُقْنِي وَعَافِنِي وارْحَمْنِي» ”اے اللہ! مجھے ہدایت عطا فرما، مجھے رزق دے، مجھے عافیت بخش اور مجھ پر رحم فرما۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

سیدہ عائشہ رضی اللہ عنہا سے روایت ہے کہ رسول اللہ ﷺ یوں دعا فرمایا کرتے تھے: «اللَّهُمَّ عافِنِي فِي جَسَدِي، وَعافِنِي فِي بَصَرِي، وَاجْعَلْهُ الْوارِثَ مِنِّي، لَا إِلَهَ إِلَّا اللهُ الْحَلِيمُ الْكَرِيمُ، سُبْحانَ اللهِ رَبِّ الْعَرْشِ الْعَظِيمِ، الْحَمْدُ للهِ رَبِّ الْعالَمِينَ» ”اے اللہ! مجھے میرے جسم میں عافیت عطا فرما، میری بصارت میں عافیت دے اور اسے میرا وارث بنا دے (یعنی تادمِ مرگ سلامت رکھ)، اللہ کے سوا کوئی معبود نہیں جو نہایت بردبار اور صاحبِ کرم ہے، اللہ پاک ہے جو عرشِ عظیم کا رب ہے، اور تمام تعریفیں اللہ کے لیے ہیں جو تمام جہانوں کا پالنے والا ہے۔“
یہ حدیث صحیح الاسناد ہے بشرطیکہ حبیب کا سماع عروہ سے ثابت ہو، اور شیخین نے اسے روایت نہیں کیا۔