المستدرك على الصحيحين

سیدنا ابوہریرہ رضی اللہ عنہ سے روایت ہے کہ نبی کریم ﷺ نے فرمایا: ”جس نے ایک مرتبہ اللہ کی بڑائی بیان کی (اللہ اکبر کہا) اس کے لیے بیس نیکیاں لکھ دی جاتی ہیں اور اس کے بیس گناہ مٹا دیے جاتے ہیں، اور جس نے ایک مرتبہ اللہ کی پاکیزگی بیان کی (سبحان اللہ کہا) اس کے لیے بیس نیکیاں لکھی جاتی ہیں اور بیس گناہ مٹائے جاتے ہیں، اور جس نے ایک مرتبہ اللہ کی حمد بیان کی (الحمد للہ کہا) اس کے لیے تیس نیکیاں لکھی جاتی ہیں اور تیس گناہ مٹا دیے جاتے ہیں۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا ابوامامہ رضی اللہ عنہ سے روایت ہے کہ رسول اللہ ﷺ نے فرمایا: ”جس بندے نے یہ کہا: «الْحَمْدُ للهِ عَدَدَ مَا خَلَقَ، وَالْحَمْدُ للهِ مِلْءَ مَا خَلَقَ، وَالْحَمْدُ للهِ عَدَدَ مَا فِي السَّمَاوَاتِ وَالْأَرْضِ، وَالْحَمْدُ للهِ عَدَدَ مَا أَحْصَى كِتَابُهُ، وَالْحَمْدُ للهِ عَدَدَ كُلِّ شَيْءٍ، وَسُبْحَانَ اللهِ مِثْلَهُنَّ» ”تمام تعریفیں اللہ کے لیے ہیں اس کی مخلوق کی تعداد کے برابر، تمام تعریفیں اللہ کے لیے ہیں اس کی مخلوق کے بھر جانے کے برابر، تمام تعریفیں اللہ کے لیے ہیں جو کچھ آسمانوں اور زمین میں ہے اس کی تعداد کے برابر، تمام تعریفیں اللہ کے لیے ہیں جتنا اس کی کتاب نے شمار کیا ہے اس کے برابر، اور تمام تعریفیں اللہ کے لیے ہیں ہر چیز کی تعداد کے برابر، اور اسی طرح سبحان اللہ بھی“ تو رسول اللہ ﷺ نے اس عمل کی بہت عظمت بیان فرمائی۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔