المستدرك على الصحيحين

سیدنا سعد بن مالکی (سعد بن ابی وقاص) رضی اللہ عنہ سے روایت ہے کہ میں نے رسول اللہ ﷺ کو یہ فرماتے ہوئے سنا: ”کیا میں تمہیں اللہ کے اس اسمِ اعظم کی طرف رہنمائی نہ کروں کہ جب اس کے ذریعے دعا کی جائے تو وہ قبول کرتا ہے اور جب کچھ مانگا جائے تو عطا کرتا ہے؟ یہ وہی دعا ہے جو یونس (علیہ السلام) نے تین تاریکیوں میں پکاری تھی: «لَا إِلٰهَ إِلَّا أَنْتَ سُبْحَانَكَ إِنِّي كُنْتُ مِنَ الظَّالِمِينَ» ”تیرے سوا کوئی معبود نہیں، تو پاک ہے، بے شک میں ہی زیادتی کرنے والوں میں سے ہوں““، اس پر ایک شخص نے عرض کیا: اے اللہ کے رسول ﷺ! کیا یہ دعا خاص طور پر سیدنا یونس علیہ السلام کے لیے تھی یا تمام مومنوں کے لیے عام ہے؟ تو رسول اللہ ﷺ نے فرمایا: ”کیا تو نے اللہ عزوجل کا یہ فرمان نہیں سنا: ﴿فَاسْتَجَبْنَا لَهُ وَنَجَّيْنَاهُ مِنَ الْغَمِّ وَكَذَلِكَ نُنْجِي الْمُؤْمِنِينَ﴾ ”پس ہم نے ان کی پکار سن لی اور انہیں غم سے نجات دے دی اور اسی طرح ہم ایمان والوں کو نجات دیتے ہیں“۔“ [سورة الأنبياء: 88] اور رسول اللہ ﷺ نے مزید فرمایا: ”جو بھی مسلمان اپنی بیماری کی حالت میں چالیس مرتبہ یہ کلمات پڑھے اور وہ اسی بیماری میں وفات پا جائے تو اسے شہید کا اجر دیا جائے گا، اور اگر وہ صحت یاب ہو جائے تو اس حال میں تندرست ہوگا کہ اس کے تمام گناہ معاف کر دیے گئے ہوں گے۔“

سیدنا ابوامامہ رضی اللہ عنہ سے روایت ہے کہ نبی کریم ﷺ نے فرمایا: ”بے شک اللہ تعالیٰ کا اسمِ اعظم قرآن مجید کی تین سورتوں میں ہے: سورہ بقرہ، سورہ آلِ عمران اور سورہ طہ میں۔“ (راوی کہتے ہیں کہ) میں نے انہیں تلاش کیا تو سورہ بقرہ میں آیت الکرسی میں یہ الفاظ پائے: ﴿اللَّهُ لَا إِلَهَ إِلَّا هُوَ الْحَيُّ الْقَيُّومُ﴾ [سورة البقرة: 255]، سورہ آلِ عمران کے آغاز میں: ﴿الم ٭ اللَّهُ لَا إِلَهَ إِلَّا هُوَ الْحَيُّ الْقَيُّومُ﴾ [سورة آل عمران: 1 - 2]، اور سورہ طہ میں یہ آیت: ﴿وَعَنَتِ الْوُجُوهُ لِلْحَيِّ الْقَيُّومِ﴾ [سورة طه: 111]۔

سیدنا ابوامامہ رضی اللہ عنہ سے مروی ہے کہ نبی کریم ﷺ نے فرمایا: ”بے شک اللہ تعالیٰ کا اسمِ اعظم قرآن کی تین سورتوں بقرہ، آلِ عمران اور طہ میں ہے۔“
عمرو بن ابی سلمہ کی یہ روایت ولید بن مسلم کی حدیث میں کوئی علت پیدا نہیں کرتی، کیونکہ ولید اپنے علاقے کی احادیث کے زیادہ بڑے حافظ اور پختہ راوی ہیں، علاوہ ازیں شیخین نے قاسم ابوعبدالرحمن سے استدلال نہیں کیا۔