المستدرك على الصحيحين

سیدنا بریدہ رضی اللہ عنہ سے روایت ہے کہ رسول اللہ ﷺ خطبہ ارشاد فرما رہے تھے کہ اسی دوران سیدنا حسن اور سیدنا حسین رضی اللہ عنہما تشریف لائے، وہ دونوں سرخ قمیصیں پہنے ہوئے تھے اور (بچپن کی وجہ سے) لڑکھڑاتے اور گرتے پڑتے چل رہے تھے، تو آپ ﷺ منبر سے نیچے تشریف لائے، ان دونوں کو اٹھایا اور اپنے سامنے بٹھا لیا، پھر فرمایا: ”اللہ اور اس کے رسول نے سچ فرمایا کہ ﴿إِنَّمَا أَمْوَالُكُمْ وَأَوْلَادُكُمْ فِتْنَةٌ﴾ ”تمہارے مال اور تمہاری اولاد محض ایک آزمائش ہیں“ [سورة التغابن: 15] میں نے اپنے ان دونوں بچوں کو دیکھا تو مجھ سے صبر نہ ہو سکا یہاں تک کہ میں نے نیچے اتر کر انہیں اٹھا لیا“، پھر آپ ﷺ دوبارہ اپنے خطبہ میں مصروف ہو گئے۔
یہ حدیث امام مسلم کی شرط پر صحیح ہے، لیکن شیخین نے اسے روایت نہیں کیا، اور یہ ضرورت کے وقت خطبہ منقطع کرنے اور منبر سے نیچے اترنے کے جواز میں ایک اصل (دلیل) ہے۔

سیدنا ابوذر رضی اللہ عنہ بیان کرتے ہیں کہ میں مسجد میں داخل ہوا جبکہ نبی کریم ﷺ خطبہ ارشاد فرما رہے تھے، میں سیدنا ابی بن کعب رضی اللہ عنہ کے قریب بیٹھ گیا، اسی دوران نبی کریم ﷺ نے سورہ براءت (توبہ) کی تلاوت فرمائی، تو میں نے ابی بن کعب سے پوچھا: یہ سورت کب نازل ہوئی؟ (راوی نے پوری) حدیث ذکر کی۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔

ابوالزاہریہ کہتے ہیں کہ میں جمعہ کے دن سیدنا عبداللہ بن بسر رضی اللہ عنہ کے پاس بیٹھا ہوا تھا، وہ ہمیں مسلسل احادیث سناتے رہے یہاں تک کہ امام خطبہ کے لیے نکلا، اسی دوران ایک شخص لوگوں کی گردنیں پھلانگتا ہوا آیا جبکہ رسول اللہ ﷺ خطبہ دے رہے تھے، تو آپ ﷺ نے اس سے فرمایا: ”بیٹھ جاؤ، یقیناً تم نے لوگوں کو تکلیف دی اور تم نے دیر کی۔“
یہ حدیث امام مسلم کی شرط پر صحیح ہے، لیکن شیخین نے اسے روایت نہیں کیا۔