مسند أبي يعلى الموصلي

سیدنا عمرو بن امیہ رضی اللہ عنہ سے روایت ہے کہ سیدنا عثمان بن عفان -یا سیدنا عبد الرحمن بن عوف- رضی اللہ عنہما کا گزر ایک چادر کے پاس سے ہوا تو انہوں نے اسے گراں (مہنگا) پایا، پھر وہی چادر سیدنا عمرو بن امیہ رضی اللہ عنہ کے پاس سے گزری تو انہوں نے اسے خرید لیا اور اپنی زوجہ سیدہ سخیلہ بنت عبیدہ بن حارث بن مطلب رضی اللہ عنہا کو پہنا دی، اس کے بعد ان کے پاس سے سیدنا عثمان -یا سیدنا عبد الرحمن- رضی اللہ عنہما کا گزر ہوا تو انہوں نے دریافت کیا: ”اس چادر کا کیا ہوا جو تم نے خریدی تھی؟“ سیدنا عمرو رضی اللہ عنہ نے جواب دیا: ”میں نے وہ (اپنی زوجہ) سخیلہ بنت عبیدہ پر صدقہ کر دی ہے،“ اس پر انہوں نے کہا: ”بے شک تم اپنے اہل و عیال کے ساتھ جو بھی بھلائی کرو وہ صدقہ ہی ہے،“ سیدنا عمرو رضی اللہ عنہ نے فرمایا: ”میں نے رسول اللہ ﷺ کو یہی فرماتے سنا ہے،“ چنانچہ جب رسول اللہ ﷺ کے سامنے سیدنا عمرو رضی اللہ عنہ کا یہ قول ذکر کیا گیا تو آپ ﷺ نے ارشاد فرمایا: ”عمرو نے سچ کہا ہے، تم اپنے اہل و عیال کے ساتھ جو کچھ بھی (حسنِ سلوک) کرتے ہو وہ ان پر تمہاری جانب سے صدقہ ہی ہوتا ہے۔“

جعفر بن عمرو بن امیہ ضمری رحمہ اللہ اپنے والد سیدنا عمرو بن امیہ ضمری رضی اللہ عنہ سے روایت کرتے ہیں کہ انہوں نے رسول اللہ ﷺ کو دیکھا کہ ”آپ ﷺ دستی کے گوشت میں سے تناول فرما رہے تھے اور اس میں سے (دانتوں کے ذریعے) بوٹیاں نوچ رہے تھے، پھر آپ ﷺ نماز کے لیے تشریف لائے اور نماز ادا فرمائی جبکہ آپ ﷺ نے (گوشت کھانے کی وجہ سے دوبارہ) وضو نہیں کیا۔“