مسند أبي يعلى الموصلي

حَدَّثَنَا عَبْدُ الْأَعْلَى بْنُ حَمَّادٍ ، حَدَّثَنَا عُثْمَانُ بْنُ عُمَرَ ، حَدَّثَنَا أُسَامَةُ بْنُ زَيْدٍ ، عَنِ الْقَاسِمِ بْنِ مُحَمَّدٍ ، عَنْ عَائِشَةَ : أَنَّ بَرِيرَةَ كَانَتْ مُكَاتَبَةً لِأُنَاسٍ مِنَ الْأَنْصَارِ ، قَالَتْ : فَأَرَدْتُ أَنْ أَبْتَاعَهَا فَأُعْتِقَهَا ، فَأَمَرْتُهَا أَنْ تَأْتِيَهُمْ فَتُخْبِرَهُمْ ، فَقَالُوا : إِنْ جَعَلْتِ لَنَا وَلَاءَهَا بِعْنَاهَا ، فَاسْتَفْتَيْتُ رَسُولَ اللهِ - صَلَّى اللهُ عَلَيْهِ وَسَلَّمَ - فَقَالَ : اشْتَرِيهَا فَأَعْتِقِيهَا ، فَإِنَّمَا الْوَلَاءُ لِمَنْ أَعْطَى الثَّمَنَ ، قَالَتْ : فَكَانَتْ تَحْتَ عَبْدٍ ، فَلَمَّا أُعْتِقَتُ ، قَالَ لَهَا رَسُولُ اللهِ - صَلَّى اللهُ عَلَيْهِ وَسَلَّمَ - : اخْتَارِي : إِنْ شِئْتِ تَسْتَقِرِّي تَحْتَ هَذَا الْعَبْدِ ، وَإِنْ شِئْتِ أَنْ تُفَارِقِيهِ ، قَالَتْ : فَإِنِّي قَدْ فَارَقْتُهُ ، قَالَتْ : فَدَخَلَ عَلَيَّ رَسُولُ اللهِ - صَلَّى اللهُ عَلَيْهِ وَسَلَّمَ - وَالْمِرْجَلُ يَفُورُ بِاللَّحْمِ ، فَقَالَ : مَا هَذَا يَا عَائِشَةُ ؟ فَقَالَتْ : أَهْدَتْهُ لَنَا بَرِيرَةُ تُصُدِّقَ بِهِ عَلَيْهَا ، فَقَالَ : هُوَ لِبَرِيرَةَ صَدَقَةٌ ، وَهُوَ لَنَا هَدِيَّةٌ .

سیدہ عائشہ رضی اللہ عنہا سے روایت ہے کہ سیدہ بریرہ رضی اللہ عنہا انصار کے کچھ لوگوں کی مکاتبہ لونڈی تھیں، وہ بیان کرتی ہیں کہ ”میں نے انہیں خرید کر آزاد کرنے کا ارادہ کیا اور انہیں حکم دیا کہ وہ اپنے مالکان کے پاس جا کر انہیں اس کی خبر دیں، ان کے مالکان نے کہا: اگر آپ ولاء (وراثت کا حق) ہمارے لیے رہنے کی شرط منظور کریں گی تو ہم انہیں آپ کے ہاتھ فروخت کر دیں گے، میں نے اس معاملے میں رسول اللہ ﷺ سے فتویٰ طلب کیا تو آپ ﷺ نے ارشاد فرمایا: ”تم انہیں خرید کر آزاد کر دو، کیونکہ ولاء کا حق تو اسی کا ہوتا ہے جو قیمت ادا کر کے آزاد کرے“، سیدہ عائشہ رضی اللہ عنہا فرماتی ہیں کہ وہ ایک غلام کے نکاح میں تھیں، چنانچہ جب وہ آزاد ہو گئیں تو رسول اللہ ﷺ نے انہیں اختیار دیتے ہوئے فرمایا: ”تمہیں اختیار ہے: اگر چاہو تو اس غلام کے نکاح میں برقرار رہو اور اگر چاہو تو اس سے علیحدگی اختیار کر لو“، انہوں نے عرض کیا: میں نے اس سے علیحدگی اختیار کر لی ہے، سیدہ عائشہ رضی اللہ عنہا بیان کرتی ہیں کہ پھر ایک مرتبہ رسول اللہ ﷺ میرے پاس تشریف لائے جبکہ ہنڈیا میں گوشت جوش مار رہا تھا، آپ ﷺ نے دریافت فرمایا: ”اے عائشہ! یہ کیا ہے؟“ میں نے عرض کیا: یہ ہمیں سیدہ بریرہ رضی اللہ عنہا نے ہدیہ دیا ہے، جبکہ انہیں یہ گوشت صدقے میں ملا تھا، تو آپ ﷺ نے ارشاد فرمایا: ”یہ بریرہ کے لیے صدقہ ہے اور ہمارے لیے ہدیہ ہے“۔“