مصنف ابن ابي شيبه

ابراہیم فرماتے ہیں کہ غلام دیت ادا نہیں کرے گا اور نہ ہی اس سے دیت وصول کی جائے گی۔

حضرت ابن جریج فرماتے ہیں کہ میں نے حضرت عطاء سے پوچھا : اس شخص کے متعلق جو غلام کو قتل کردے اس کی دیت کون ادا کرے گا ؟ وہی شخص یا اس کی قوم ؟ آپ نے فرمایا : اس کی قوم۔

حضرت شعبہ فرماتے ہیں کہ حضرت حماد اور حضرت حکم ان دونوں حضرات نے ایسے آدمی کے بارے میں ارشاد فرمایا جس نے کسی سواری کو غلطی سے ماردیا تو اس کا ضمان اس کے مال میں لازم ہوگا اور اگر اس نے کسی غلام کو قتل کیا تو اس کی دیت خاندان والوں پر ہوگی۔

یونس فرماتے ہیں کہ حضرت زہری نے اس آزاد شخص کے بارے میں جس نے کسی غلام کو غلطی سے قتل کردیا ہو یوں فرمایا اس غلام کی قیمت اس کے خاندان والوں پر لازم ہوگی۔

حضرت زید بن ابراہیم فرماتے ہیں کہ حضر ت حسن بصری نے ارشاد فرمایا : جب آزاد شخص کے غلام کو غلطی سے قتل کردیا تو وہ ایک غلام کو آزاد کرے گا اور اس پر دیت لازم ہوگی۔

حضرت محمد بن راشد فرماتے ہیں کہ حضرت مکحول نے ارشاد فرمایا : قبیلہ والوں پر غلام کی دیت میں سے کوئی چیز لازم نہیں ہے۔