مصنف ابن ابي شيبه

حضرت علی رضی اللہ عنہ کا ارشاد ہے کہ ایک حصہ میں آدھی دیت ہے۔

حضرت عاصم بھی حضرت علی رضی اللہ عنہ سے اسی طرح روایت کرتے ہیں۔

حضرت زید بن ثابت اور حضرت علی رضی اللہ عنہ اور حضرت عروہ بن زبیر اور حضرت عمرو بن شعیب ان تمام کا ارشاد ہے کہ دونوں خصیے برابر ہیں۔

حضرت مجاہد کا ارشاد ہے کہ خصیتین میں دیت پوری ہوگی یعنی پچاس پچاس اونٹ ہوں گے۔

حضرت ابن جریج ، حضرت عطاء سے نقل کرتے ہیں کہ میں نے ان سے خصیتین کے بارے میں سوال کیا ؟ تو انہوں نے کہا کہ پچاس پچاس اونٹ دیت ہیں لیکن میں نے یہ کسی مضبوط (ثقہ) راوی سے نہیں سنا۔

حضرت عبداللہ سے مروی ہے کہ خصیتین برابر ہیں (یعنی دیت میں) ۔

حضرت عبداللہ کا ارشاد ہے کہ خصیتین دیت میں برابر ہیں۔

حضرت سعید بن مسیب کا ارشاد ہے کہ بائیں خصیہ میں دو تہائی دیت ہے اور دائیں میں ایک تہائی دیت ہے داؤد فرماتے ہیں کہ میں نے سوال کیا کہ ایسا کیوں ہے ؟ انہوں نے جواب دیا کہ یہ اس لیے ہے کہ جب بایاں خصیہ ضائع ہوجائے تو اولاد نہیں ہوتی اور اگر دایاں چلا جائے تو اولاد ہوسکتی ہے۔

حضرت منصور کا ارشاد ہے کہ میں نے یہ بات ابراہیم سے بیان کی تو انہوں نے جواب دیا کہ یہ دونوں برابر ہیں۔