مصنف ابن ابي شيبه

حضرت عبد اللہ بن عمرو رضی اللہ عنہ فرماتے ہیں کہ رسول اللہ صلی اللہ علیہ وآلہ وسلم نے سفید بال اکھیڑنے سے منع کیا اور فرمایا : یہ مومن کا نور ہے۔

حضرت طلق بن حبیب فرماتے ہیں کہ حجام نے نبی کریم صلی اللہ علیہ وآلہ وسلم کی مونچھ کو چھانٹا اس نے نبی کریم صلی اللہ علیہ وآلہ وسلم کی داڑھی میں ایک سفید بال دیکھا تو اس کو کاٹنا چاہا، تو رسول اللہ صلی اللہ علیہ وآلہ وسلم نے اس کا ہاتھ پکڑلیا اور ارشاد فرمایا : جو شخص اسلام میں بوڑھا ہو تو قیامت کے دن اس کے لیے ایک نور ہوگا۔

حضرت قتادہ فرماتے ہیں کہ حضرت انس سفید بالوں کے اکھیڑنے کو مکروہ سمجھتے تھے۔

حضرت قتادہ فرماتے ہیں کہ حضرت سعید بن جبیر نے ارشاد فرمایا : سفید بال اکھیڑنے کی وجہ سے آدمی کو عذاب دیا جائے گا۔

حضرت حمید اعرج فرماتے ہیں کہ حضرت مجاہد فرمایا کرتے تھے کہ تم سفید بالوں کو مت اکھیڑو۔ بیشک یہ قیامت کے دن نور ہوگا۔

حضرت ابو معشر فرماتے ہیں کہ ابراہیم نے سفید بال اکھیڑنے کو مکروہ قرار دیا اور اس کو کاٹنے میں کوئی حرج نہیں سمجھا۔