مصنف ابن ابي شيبه

نبی کریم صلی اللہ علیہ وسلم نے ارشاد فرمایا : بیع کرنے والوں کو الگ ہونے سے پہلے اختیار ہے، الا یہ کہ ان کی بیع میں خیار کی شرط ہو (تب افتراق کے بعد بھی ان کو خیار ہوگا) ۔

نبی کریم صلی اللہ علیہ وسلم نے ارشاد فرمایا : بائع اور مشتری کو جدا ہونے سے پہلے تک اختیار ہے۔

نبی کریم صلی اللہ علیہ وسلم سے اسی طرح مروی ہے۔

نبی کریم صلی اللہ علیہ وسلم نے ارشاد فرمایا : بیع کرنے والوں کو جدا ہونے تک اختیار ہے یا یہ کہ ان کے درمیان کوئی خیار شرط وغیرہ ہو۔

نبی کریم صلی اللہ علیہ وسلم نے ارشاد فرمایا : بیع کرنے والوں کو اختیار ہے جب تک کہ وہ راضی ہو کر الگ نہ ہوجائیں۔

نبی کریم صلی اللہ علیہ وسلم نے ارشاد فرمایا : بیع کرنے والوں کو الگ ہونے سے قبل اختیار ہے ۔

حضرت شریح سے اسی طرح مروی ہے۔

حضرت شعبی سے مروی ہے کہ ایک شخص نے دوسرے سے ایک گھوڑا خریدا، پھر اس نے الگ ہونے سے قبل واپس کرنا چاہا، لیکن حضرت شعبی نے بیع کو اس پر لازم قرار دیا، تو ابو الضحٰی نے آپ کے سامنے گواہی دی کہ حضرت شریح کے پاس بھی ایسا مسئلہ آیا تھا، آپ نے بائع پر مبیع کو واپس کردیا تھا۔ حضرت شعبی نے حضرت شریح کے قول کی طرف رجوع فرما لیا۔

حضرت ابن عمر رضی اللہ عنہما ارشاد فرماتے ہیں کہ بیع کرنے والوں کو جدا ہونے تک اختیار ہے ۔ حضرت ابن عمر رضی اللہ عنہما جب بیع کرتے تو وہاں سے پھرجاتے (الگ ہوجاتے) تاکہ بیع نافذ ہوجائے۔

حضرت شریح فرماتے ہیں کہ بیع کرنے والوں کو جدا ہونے تک اختیار ہے۔

حضرت سعید بن المسیب سے بھی یہی مروی ہے۔

نبی کریم صلی اللہ علیہ وسلم سے بھی اسی طرح مروی ہے۔