مصنف ابن ابي شيبه

حضرت عمر بن عبد العزیز رضی اللہ عنہ نے بھائی کی گواہی بھائی کے حق میں قبول فرمائی۔

حضرت عطاء بن ابی رباح رحمہ اللہ سے مروی ہے کہ محلہ کے دو آدمیوں کے درمیان جھگڑا ہوگیا، ان میں سے ایک کے لیے اس کے بھائی نے حضرت شریح رحمہ اللہ کے سامنے گواہی دی، دوسرے شخص نے کہا کہ تو اس کا بھائی ہے، حضرت شریح رحمہ اللہ نے دریافت فرمایا کہ : کیا تیرے لئے کوئی چیز ہے اس شخص سے کہ تو اس پر گواہی دے ؟ اس نے کہا کہ نہیں۔ آپ نے خصم سے فرمایا پھر کس چیز کی وجہ سے تو اس کی گواہی کو رد کر رہا ہے ؟

حضرت شعبی رحمہ اللہ فرماتے ہیں کہ سب سے قریبی رشتہ دار کہ جس کی گواہی جائز ہے وہ ایک بھائی کی دوسرے بھائی کے لیے گواہی ہے۔

ابراہیم رحمہ اللہ بھائی کی گواہی بھائی کے حق میں قبول ( معتبر) سمجھتے تھے۔

حضرت شعبی رحمہ اللہ سے اسی طرح مروی ہے۔

حضرت ابن زبیر رضی اللہ عنہ نے بھائی کی گواہی کو بھائی کے حق میں معتبر قرار دیا۔

حسن رحمہ اللہ بھائی کی گواہی بھائی کے حق میں معتبر سمجھتے تھے۔

حضرت شریح رحمہ اللہ فرماتے ہیں کہ بھائی اگر عادل ہو تو اس کی گواہی بھائی کے حق میں معتبر ہے۔

حضرت شریح رحمہ اللہ نے بھائی کی گواہی بھائی کے حق میں قبول فرمائی۔