مصنف ابن ابي شيبه

سلیمان رحمہ اللہ فرماتے ہیں کہ میں نے حضرت عکرمہ رحمہ اللہ سے عرض کیا کہ حجام کی کمائی کو کیوں ناپسند کیا گیا ہے ؟ آپ رحمہ اللہ نے فرمایا : اس کو ناپسند نہیں کیا گیا۔

حضرت ابو قلابہ فرماتے ہیں کہ اگر حجام خون نہیں چوستا تو میں اس کمائی میں کوئی حرج نہیں سمجھتا۔

حضرت زید بن اسامہ رضی اللہ عنہ فرماتے ہیں کہ میں نے حضرت سالم رحمہ اللہ اور حضرت قاسم رحمہ اللہ سے حجام کی کمائی کے متعلق دریافت کیا ؟ آپ رضی اللہ عنہ دونوں حضرات نے اس میں کوئی حرج نہ سمجھا اور قرآن پاک کی یہ آیت تلاوت فرمائی : { قُلْ لاَ أَجِدُ فِیمَا أُوحِیَ إلَیَّ مُحَرَّمًا عَلَی طَاعِمٍ یَطْعَمُہُ }

حضرت عثمان بن عفان رحمہ اللہ فرماتے ہیں کہ مجھے حجام اور حمّام کی اجرت اور کمائی پسند نہیں۔

حضرت حارث رحمہ اللہ کا ایک غلام تھا جو حجام تھا۔

حضرت قاسم رحمہ اللہ سے حجامت کے کمائی کے متعلق دریافت کیا گیا ؟ آپ رحمہ اللہ نے اس میں کوئی حرج نہ سمجھا۔

حضرت حرام بن سعد بن محیّصۃ رحمہ اللہ کے والد نے نبی کریم صلی اللہ علیہ وسلم سے حجام کی کمائی کے متعلق دریافت کیا ؟ آپ صلی اللہ علیہ وسلم نے اس سے منع فرمایا، وہ مسلسل آپ صلی اللہ علیہ وسلم سے کلام کرتے رہے یہاں تک کہ آپ صلی اللہ علیہ وسلم نے ارشاد فرمایا : اُن پیسوں سے اونٹ کو چارہ ڈال دو یا غلام کو کھلا دو ۔

حضرت انس رضی اللہ عنہ سے مروی ہے کہ نبی کریم صلی اللہ علیہ وسلم نے ابو طیبہ حجام سے پچھنے لگوائے اور اس کو دو صاع کھانا عطاء فرمایا اور اس کے گھر والوں سے بات فرمائی انہوں نے اس کے غلہ میں تخفیف کردی۔

حضرت ابن عمر رضی اللہ عنہما سے مروی ہے کہ ابو طیبہ نامی حجام سے آپ صلی اللہ علیہ وسلم نے پچھنے لگوائے اور اس سے پوچھا تیری کتنی اجرت ہے ؟ اس نے عرض کیا تین صاع ۔ آپ صلی اللہ علیہ وسلم نے اس میں سے ایک صاع کم کرو ا کر اس کو اس کا اجر ( دو صاع) عطا فرمایا۔

حضرت عطاء رحمہ اللہ فرماتے ہیں کہ حجام کی کمائی میں کوئی حرج نہیں ہے جو وہ قینچی کے ساتھ کمائے۔

حضرت ابن عباس رضی اللہ عنہما ارشاد فرماتے ہیں کہ نبی کریم صلی اللہ علیہ وسلم نے پچھنے لگوائے اور حجام کو اجرت دی ، اگر حجام کی کمائی حرام ہوتی تو آپ صلی اللہ علیہ وسلم اس کو عطا نہ فرماتے ۔

حضرت عطاء رحمہ اللہ فرماتے ہیں کہ میں حضرت ابن عباس رضی اللہ عنہما کی خدمت میں حاضر ہوا ایک غلام آپ رضی اللہ عنہان کا غلام ان کی حجامت کر رہا تھا۔ میں نے سوال کیا کہ آپ اس اجرت کا کیا کریں گے ؟ انہوں نے جواب دیا کہ میں اس کو خود بھی کھاؤں گا اور اس کو بھی کھلاؤں گا۔ انہوں نے اپنے ہاتھ سے غلام کے منہ کی طرف اشارہ کیا۔

حضرت علی رضی اللہ عنہ سے مروی ہے کہ نبی کریم صلی اللہ علیہ وسلم نے پچھنے لگوائے پھر حجام سے دریافت کیا کہ تیری اجرت کتنی ہے ؟ اس نے عرض کیا کہ دو صاع۔ حجام نے رسول اللہ صلی اللہ علیہ وسلم کے لیے ایک صاع کم کردیا۔ حضور ﷺ نے مجھے حکم دیا اور میں نے اس کو ایک صاع دے دیا۔

حضرت ابن عباس رضی اللہ عنہما ارشاد فرماتے ہیں کہ نبی کریم صلی اللہ علیہ وسلم نے پچھنے لگوائے اور اس کو اجرت دی اور اگر ا س کمائی میں کوئی حرج ہوتا تو آپ صلی اللہ علیہ وسلم اس کو عطا نہ فرماتے ۔

حضرت ابن عباس رضی اللہ عنہما کی خدمت میں ایک خاتون حاضر ہوئی اور عرض کیا میں عراق سے ہوں، میرا ایک غلام ہے جو حجامت کرتا ہے، عراق کے لوگوں کا خیال ہے کہ میں خون کی کمائی کھاتی ہوں، آپ رضی اللہ عنہ نے فرمایا : وہ کچھ بھی گمان نہیں کرتے، تو اپنے غلام کی کمائی کھاتی ہے، خون کی کمائی نہیں کھاتی۔

حضرت عکرمہ رحمہ اللہ فرماتے ہیں کہ نبی کریم صلی اللہ علیہ وسلم نے پچھنے لگوائے اور حجام کو مزدوری میں ایک دینار عطا فرمایا۔

حضرت ابو جعفر رحمہ اللہ فرماتے ہیں کہ کوئی حرج نہیں کہ آدمی پچھنے لگوائے اور حجام کے ساتھ شرط نہ لگائے۔

حضرت ابوہریرہ رضی اللہ عنہارشاد فرماتے ہیں حجام کی کمائی رشوت ہے۔

حضرت سفیان، حضرت منصور اور ابراہیم رحمہ اللہ حجام کی کمائی کو ناپسند فرماتے تھے۔

حضرت ابوہریرہ رضی اللہ عنہ سے مروی ہے کہ نبی کریم صلی اللہ علیہ وسلم نے حجام کی کمائی سے منع فرمایا ہے۔

حضرت ابو جحیفہ رضی اللہ عنہ نے ایک غلام خریدا جو حجام تھا، آپ رضی اللہ عنہ نے اس کے اوزار توڑ ڈالے اور فرمایا : آپ صلی اللہ علیہ وسلم نے خون کی کمائی سے منع فرمایا ہے۔

حضرت عروہ رضی اللہ عنہ سے مروی ہے کہ انصار کے نوجوانوں کے لئے ایک حجام تھا، نبی کریم صلی اللہ علیہ وسلم نے ان کو حکم فرمایا کہ اس کی کمائی اونٹوں کے چارے میں استعمال کرو۔

حضرت رافع بن خدیج رضی اللہ عنہ سے مروی ہے کہ نبی کریم صلی اللہ علیہ وسلم نے ارشاد فرمایا : حجامت کی کمائی، زانیہ کے مہر کی کمائی اور کتے کی قیمت حرام ہیں۔

ابراہیم رحمہ اللہ حجام کی کمائی کو ناپسند فرماتے تھے۔