مصنف ابن ابي شيبه

حضرت فضل بن عباس فرماتے ہیں کہ سفر حج میں، میں نبی کریم صلی اللہ علیہ وآلہ وسلم کا ردیف تھا، میں مسلسل نبی کریم صلی اللہ علیہ وآلہ وسلم سے تلبیہ سنتا رہا، یہاں تک کہ آپ صلی اللہ علیہ وآلہ وسلم نے جمرہ عقبہ کی رمی کرلی، پھر اس کے بعد آپ صلی اللہ علیہ وآلہ وسلم نے تلبیہ کہنا چھوڑ دیا۔

حضرت عکرمہ فرماتے ہیں کہ میں حضرت حسین بن علی رضی اللہ عنہ کے ساتھ مزدلفہ سے روانہ ہوا، میں آپ سے مسلسل تلبیہ سنتا رہا یہاں تک کہ آپ نے جمرہ کی رمی کرلی، میں نے آپ سے دریافت کیا اے ابو عبد اللہ ! تلبیہ کی کیا صورت ہے ؟ آپ نے فرمایا : میں نے اپنے والد حضرت علی رضی اللہ عنہ سے تلبیہ سنا یہاں تک کہ آپ نے جمرہ کی رمی کرلی، اور انہوں نے مجھ سے بیان کیا کہ نبی کریم صلی اللہ علیہ وآلہ وسلم جمرہ کی رمی کرنے تک تلبیہ پڑھتے رہتے تھے۔

حضرت عبد اللہ ارشاد فرماتے ہیں کہ میں نبی کریم صلی اللہ علیہ وآلہ وسلم کے ساتھ حج کے سفر میں نکلا، آپ صلی اللہ علیہ وآلہ وسلم مسلسل تلبیہ پڑھتے رہے، یہاں تک کہ آپ صلی اللہ علیہ وآلہ وسلم جمرہ عقبہ پر تشریف لائے، پھر حضور تلبیہ کے ساتھ تکبیر یا تہلیل کو بھی ملا کر پڑھنے لگے۔

حضرت فضل بن عباس فرماتے ہیں کہ نبی کریم صلی اللہ علیہ وآلہ وسلم نے جمرہ عقبہ کی رمی تک تلبیہ کہنا نہیں چھوڑا، آپ صلی اللہ علیہ وآلہ وسلم نے سات کنکریوں سے اس کی رمی فرمائی اور ہر کنکری پر آپ صلی اللہ علیہ وآلہ وسلم تکبیر پڑھتے۔

حضرت ابن عباس رضی اللہ عنہما فرماتے ہیں کہ نبی کریم صلی اللہ علیہ وآلہ وسلم جمرہ عقبہ کی رمی تک تلبیہ پڑھتے رہتے۔

حضرت عمرو بن میمون فرماتے ہیں کہ میں نے حضرت عمربن خطاب کے ساتھ دو سال حج کیا، ایک حج اس سال کیا جس سال میں آپ کی شہادت کا واقعہ پیش آیا، آپ تلبیہ پڑھتے رہے یہاں تک کہ آپ نے بطن وادی سے جمرہ عقبہ کی رمی کرلی (تو تلبیہ ترک کردیا) ۔

حضرت ابن عباس رضی اللہ عنہما سے مروی ہے کہ حضرت عمر جمرہ عقبہ کی رمی تک تلبیہ پڑھتے رہتے۔ اور حضرت ابن عباس رضی اللہ عنہما بھی عقبہ کی رمی تک تلبیہ پڑھتے رہتے، اور فرماتے کہ اب ہم حلال ہونے کو کھول رہے ہیں۔

حضرت عبد اللہ جمرہ عقبہ کی رمی تک تلبیہ پڑھتے رہتے۔

حضرت عطاء سے مروی ہے کہ حضرت علی رضی اللہ عنہ تلبیہ پڑھتے رہتے، جب آپ جمرہ عقبہ کی رمی فرما لیتے تو تلبیہ کہنا بند کردیتے۔

حضرت عبد اللہ جب تک جمرہ عقبہ کی رمی نہ کرلیتے تلبیہ کہنا ترک نہ کرتے۔

حضرت عکرمہ فرماتے ہیں کہ حضرت ابن عباس رضی اللہ عنہما نے مجھے حضرت حسین بن علی رضی اللہ عنہ کے ساتھ (سفر حج میں) بھیجا، آپ جمرہ عقبہ کی رمی تک تلبیہ پڑھتے رہتے۔

حضرت سعید بن المسیب فرماتے ہیں کہ سفر حج میں تلبیہ پڑھتا رہے گا یہاں تک کہ عرفہ میں شام کے وقت داخل ہوجائے۔

حضرت افلح فرماتے ہیں کہ میں نے حضرت قاسم کو سفر حج میں دیکھا آپ نے تلبیہ کہنا تب بند کیا جب وقوف عرفہ کی شام ہوگئی، فرمایا کہ حضرت عائشہ رضی اللہ عنہا اس طرح کرتی تھیں۔

حضرت عروہ حج میں تلبیہ کہنا بند نہ کرتے تھے، یہاں تک کہ عرفات کی شام ہوجاتی۔

حضرت ابن عمر رضی اللہ عنہما سفر حج میں جب حرم میں داخل ہوتے تو تلبیہ پڑھنے سے رک جاتے۔ پھر جب طواف شروع کرتے تو تلبیہ پڑھتے۔

حضرت عبد اللہ جب تک جمرہ عقبہ کو پہلی کنکری نہ مارتے تب تک تلبیہ پڑھنا ترک نہ کرتے۔

حضرت محمد بن اسحاق فرماتے ہیں کہ میرے والد محترم نے حضرت عکرمہ سے سوال کیا اور میں سن رہا تھا کہ تلبیہ پڑھنا کب ترک کرے ؟ میں نے سنا کہ آپ نے جوب دیا کہ نبی کریم صلی اللہ علیہ وآلہ وسلم اور حضرات شیخین نے جمرہ کی رمی تک تلبیہ پڑھا۔

حضرت عبد اللہ نے جب تک جمرہ عقبہ کو پہلی کنکری نہ مار دی تب تک تلبیہ پڑھتے رہے ( پہلی کنکری پر تلبیہ پڑھنا چھوڑا) ۔