مصنف ابن ابي شيبه

حضرت عائشہ رضی اللہ عنہا سے مروی ہے کہ نبی کریم صلی اللہ علیہ وآلہ وسلم نے نکلنے والی رات میں مقام بطحاء سے رات کے ابتدائی حصے میں سفر کیا۔

حضرت ابو رافع نبی کریم صلی اللہ علیہ وآلہ وسلم کے سامان پر مامور تھے وہ فرماتے ہیں کہ میں آیا اور میں نے مقام ابطح میں خیمہ نصب کیا پھر نبی کریم صلی اللہ علیہ وآلہ وسلم تشریف لائے اور اس میں کچھ قیام فرمایا۔

ابراہیم سے مروی ہے کہ نبی کریم صلی اللہ علیہ وآلہ وسلم نے کچھ دیر مقام ابطح میں آرام فرمایا پھر رات کے ابتدائی حصہ میں سفر کا آغاز فرمایا۔

حضرت عمر نے ارشاد فرمایا : اے آل خزیمہ ! نکلنے والی رات سرسبز جگہ قیام کرو۔

حضرت عمرو بن مرہ فرماتے ہیں کہ حضرت اسود مقام ابطح میں قیام کے لیے رکے۔ انہوں نے اونٹ کی آواز سنی تو متوجہ ہوئے دیکھنے کے لیے کہ یہ کون ہیں ؟ حضرت ابن عمر رضی اللہ عنہما واپسی کے لیے روانہ ہو رہے تھے۔

حضرت یزید فرماتے ہیں کہ میں حضرت سعید بن جبیر کے ساتھ حج پر گیا، جب ہم واپس نکلنے لگے تو ہم مقام ابطح پر آئے جس وقت ہم منیٰ سے واپس آئے۔

ابراہیم فرماتے ہیں کہ جب مقام ابطح میں آئے تو وہاں اپنا سامان رکھ لے پھر بیت اللہ کا طواف کرے اور وہاں کچھ دیر آرام کرے پھر واپسی کے لیے نکلے۔

حضرت ابن طاؤس سے مروی ہے کہ ان والد محترم مقام شعب خوز میں کچھ دیر قیام کرتے۔

حضرت عمرو بن دینار سے مروی ہے کہ نبی کریم صلی اللہ علیہ وآلہ وسلم ، اور حضرات شیخین کچھ دیر مقام ابطح میں قیام فرماتے ۔