مصنف ابن ابي شيبه

حضرت عبد الرحمن بن حمید فرماتے ہیں کہ ہم نے حضرت سائب سے دریافت کیا کہ آپ نے مکہ میں قیام کے متعلق کیا سن رکھا ہے ؟ آپ نے فرمایا میں نے حضرت العلاء بن الحضرمی سے سنا کہ نبی کریم صلی اللہ علیہ وآلہ وسلم نے ارشاد فرمایا : مکہ سے ہجرت کرنے والا شخص حج کے بعد تین دن تک مکہ میں قیام کرسکتا ہے۔

حضرت عامر فرماتے ہیں کہ اصحاب نبی صلی اللہ علیہ وآلہ وسلم (مہاجرین) میں سے کسی نے بھی مکہ میں قیام نہ فرمایا : اور حضرت عامر فرماتے تھے قیام نہیں ہے ؟

حضرت ابو سفیان فرماتے ہیں کہ میں نے حضرت جابر بن عبد اللہ رضی اللہ عنہ کے ساتھ مکہ میں چھ ماہ قیام کیا۔

حضرت عطاء فرماتے ہیں کہ حضرت جابر بن عبد اللہ رضی اللہ عنہ ، حضرت ابن عمر رضی اللہ عنہما ، حضرت ابن عباس رضی اللہ عنہما ، حضرت ابو ہریرہ رضی اللہ عنہ اور حضرت ابو سعید الخدری نے مکہ میں ہمارے پاس قیام کیا۔

حضرت ہشام اپنے والد سے روایت کرتے ہیں کہ حضرت ابن زبیر نے مکہ میں دو سال تک قیام فرمایا۔

حضرت عبد الملک فرماتے ہیں کہ میں نے مکہ میں قیام کیا تو وہاں پر حضرت علی رضی اللہ عنہ بن حسین اور حضرت سعید بن جبیر بھی موجود تھے۔

حضرت عطاء فرماتے ہیں کہ میں اور حضرت عبید بن عمیر اللیثی حضرت عائشہ رضی اللہ عنہا کے پاس آئے آپ مقام ثبیر میں مقیم تھیں، راوی کہتے ہیں کہ انہوں نے نذر مانی تھی کہ وہ ایک ماہ تک قیام کریں گی، اور ان کے بھائی حضرت عبد الرحمن نے ان کو اس سے منع فرمایا اور فرماتے تھے کہ بیت اللہ میں قیام کرنا اور اس کا طواف کرنا میرے نزدیک اس سے افضل اور بہتر ہے، راوی کہتے ہیں جب حضرت عبد الرحمن کی وفات ہوئی تو حضرت عائشہ رضی اللہ عنہا نکلیں۔

حضرت عمر ارشاد فرماتے ہیں کہ حج سے چلے جانے بعد مکہ میں تین دن سے زیادہ قیام نہ کرو۔

اسماعیل فرماتے ہیں کہ جب حضرت شعبی سے مکہ میں قیام کرنے کے متعلق دریافت کیا گیا تو آپ نبی کریم صلی اللہ علیہ وآلہ وسلم کا وہ مکتوب لے آئے جو خزاعہ والوں کی طرف لکھا تھا، اس میں مکتوب تھا کہ میں نے ہر مہاجر کے لیے وہ حکم لیا ہے جو اپنے لیے ہے اگرچہ وہ اسی زمین سے تھا کہ وہ حج اور عمرہ کے علاوہ مکہ میں قیام نہیں کرے گا۔

حضرت عبد اللہ فرماتے ہیں کہ مکہ اقامت اور ٹھہرنے کا گھر نہیں ہے۔

حضرت عامر فرماتے ہیں کہ مہاجر کے لیے مکہ میں تین دن سے زیادہ قیام کرنے کی اجازت نہیں۔