مصنف ابن ابي شيبه

حضرت عمر بن عبید اللہ بن معمر نے حالت احرام میں نکاح کرنے کا ارادہ کیا، انہوں نے کسی شخص کو حضرت ابان بن عثمان کے پاس بھیجا کہ ان سے دریافت کرو ؟ حضرت ابان نے فرمایا : حضرت عثمان نبی کریم صلی اللہ علیہ وآلہ وسلم کی حدیث بیان کرتے ہیں کہ محرم نہ نکاح کرے اور نہ ہی کسی کی طرف پیغام نکاح بھیجے۔

حضرت ابو رافع فرماتے ہیں کہ حضور ا قدس (صلی اللہ علیہ وآلہ وسلم) نے حضرت میمونہ سے جب نکاح فرمایا اس وقت آپ صلی اللہ علیہ وآلہ وسلم حالت احرام میں نہ تھے اور میں آپ صلی اللہ علیہ وآلہ وسلم دونوں کے درمیان قاصد تھا۔

حضرت یزید بن اصم فرماتے ہیں کہ نبی کریم صلی اللہ علیہ وآلہ وسلم نے جب نکاح فرمایا اس وقت آپ صلی اللہ علیہ وآلہ وسلم حالت احرام میں نہ تھے۔

حضرت یزید بن اصم سے مروی ہے کہ حضرت میمونہ فرماتی ہیں کہ نبی کریم صلی اللہ علیہ وآلہ وسلم نے جب ان کے ساتھ نکاح فرمایا اس وقت آپ صلی اللہ علیہ وآلہ وسلم حالت احرام میں نہ تھے۔

حضرت ابن عمر رضی اللہ عنہما اور حضرت علی رضی اللہ عنہ فرماتے ہیں کہ محرم شخص نہ نکاح کرے گا نہ کسی کا نکاح کروائے گا، اگر اس نے حالت احرام میں نکاح کیا تو اس کا نکاح باطل شمار ہوگا۔

حضرت ابن عمر رضی اللہ عنہما نے ایک بار فرمایا : محرم نہ نکاح کرے گا اور نہ ہی نکاح کا پیغام بھیجے گا اور دوسری بار فرمایا : محرم نکاح نہیں کرے گا۔

حضرت ابن عمر رضی اللہ عنہما فرماتے ہیں کہ محرم نہ نکاح کرے گا اور نہ نکاح کروائے گا۔

حضرت سعد بن ابراہیم کہتے ہیں کہ حضرت یزید بن عبد الملک نے اہل مدینہ کو لکھا کہ کیا محرم شخص نکاح کرسکتا ہے ؟ سب نے فرمایا : ان کے درمیان تفریق کردی جائے گی۔

حضرت عبد اللہ بن عمر رضی اللہ عنہما سے مروی ہے کہ اس سے مراد زکوٰۃ ہے۔

حضرت ابو اسحاق فرماتے ہیں کہ ابو میسرہ نماز کے بعد کھانا کھلاتے تھے۔

حضرت زہری فرماتے ہیں کہ محرم نہ نکاح کرے گا نہ ہی نکاح کروائے گا۔