مصنف ابن ابي شيبه

حضرت حارث فرماتے ہیں کہ حضرت علی رضی اللہ عنہ قسم کے تین روزوں کے درمیان تفریق نہیں فرماتے تھے (لگاتار رکھتے تھے) ۔

حضرت ابن عون فرماتے ہیں کہ میں نے ابراہیم سے کفارہ یمین کے تین روزوں سے متعلق دریافت کیا ؟ آپ نے فرمایا ہماری قراءت میں تو { فَصِیَامُ ثَلاَثَۃِ أَیَّامٍ مُتَتَابِعَاتٍ } کی قید موجود ہے۔

حضرت مجاہد فرماتے ہیں کہ قرآن مجید میں جتنے روزوں کا ذکر ہے سب لگاتار رکھے جائیں گے سوائے رمضان کی قضا کے۔

حضرت ابو العالیہ فرماتے ہیں کہ حضرت ابی اس کو یوں پڑھتے : { فَصِیَامُ ثَلاَثَۃِ أَیَّامٍ مُتَتَابِعَاتٍ }

حضرت عامر فرماتے ہیں کہ حضرت عبد اللہ کی قراءت یوں تھی : { فَصِیَامُ ثَلاَثَۃِ أَیَّامٍ مُتَتَابِعَاتٍ }

حسن فرماتے ہیں کہ قسم کے کفارہ کے روزوں کو لگاتار رکھے گا، اگر کسی دن عذر کی وجہ سے افطار کرلیا تو اس کے بدلے دوسرے دن قضا کرلے۔

حضرت طاؤس، حضرت عطاء اور حضرت مجاہد فرماتے ہیں کہ سوائے رمضان کے روزوں کے باقی سب روزے لگاتار رکھے جائیں گے۔