مصنف ابن ابي شيبه

ابراہیم اور حضرت شعبی فرماتے ہیں کہ جہاں پر غلام آزاد کرنا واجب ہو وہاں ولد الزنی ادا کرنا جائز نہیں ہے۔

حضرت عثمان بن الاسود فرماتے ہیں کہ میرے اھل میں سے ایک شخص فوت ہوا اور اس نے ایک غلام آزاد کرنے کی وصیت کی تھی، میں نے ایک غلام پایا جس کے ماں باپ نے ولی کی اجازت کے بغیر نکاح کیا تھا، میں نے اس بارے میں حضرت عطاء سے دریافت کیا تو آپ نے فرمایا میں تو اس کو ناپسند کرتا ہوں۔

حضرت فلان بن عمرو کہتے ہیں کہ میں نے حضرت ابو جعفر سے کفارہ یمین میں ولد الزنی آزاد کرنے کے متعلق دریافت کیا ؟ آپ نے فرمایا کافی ہوجائے گا۔

یونس فرماتے ہیں کہ ولد الزنی غلام کافی ہوجائے گا اور صحیح النسب غلام آزاد کرنے والے کو کوئی فضیلت نہیں سوائے تقویٰ کے۔

حضرت طاؤس فرماتے ہیں کہ غلام آزاد کرنے میں ولد الزنی آزاد کرنا کافی ہوجائے گا۔

ابراہیم فرماتے ہیں کہ رقبہ واجبہ میں ولد الزنی دینا کافی نہیں ہے۔

حضرت سعید بن ابو سعید فرماتے ہیں کہ ایک عورت حضرت ابو ہریرہ رضی اللہ عنہ کی خدمت میں حاضر ہوئی اور دریافت کیا کہ میرے پاس ایک لونڈی کا بیٹا ہے جو صحیح النسب نہیں ہے اور میرے ذمہ غلام آزاد کرنا واجب ہے کیا وہ غلام آزاد کرنا کافی ہوجائے گا ؟ آپ نے فرمایا : ہاں