مصنف ابن ابي شيبه

حضرت عمران بن حصین سے مروی ہے کہ نبی کریم صلی اللہ علیہ وآلہ وسلم نے ارشاد فرمایا : تمہارے بھائی کا انتقال ہوچکا ہے، کھڑے ہو جاؤ اور اس کی نماز جنازہ اد ا کرو، یعنی نجاشی کی۔

حضرت عمران بن حصین سے مروی ہے کہ نبی کریم صلی اللہ علیہ وآلہ وسلم نے ارشاد فرمایا : تمہارے بھائی نجاشی کا انتقال ہوگیا ہے، ان کی نماز جنازہ ادا کرو۔

حضرت عمران بن حصین سے اسی کے مثل منقول ہے۔

حضرت ابن جاریہ انصاری سے مروی ہے کہ نبی کریم صلی اللہ علیہ وآلہ وسلم نے ارشاد فرمایا : تمہارے بھائی نجاشی کا انتقال ہوگیا ہے، ان کی نماز جنازہ ادا کرو۔

حضرت ابو ہریرہ رضی اللہ عنہ سے مروی ہے کہ جب نجاشی کا انتقال ہوا تو نبی کریم صلی اللہ علیہ وآلہ وسلم اور آپ کے صحابہ جنت البقیع تشریف لے گئے ہم نے آپ کے پیچھے صفیں بنائیں، نبی کریم صلی اللہ علیہ وآلہ وسلم آگے بڑھے اور چار تکبیریں کہیں۔

حضرت جریر سے مروی ہے کہ نبی کریم صلی اللہ علیہ وآلہ وسلم نے ارشاد فرمایا : تمہارے بھائی نجاشی کا انتقال ہوچکا ہے اس کے لیے استغفار کرو۔

حضرت جابر بن عبد اللہ رضی اللہ عنہ سے مروی ہے کہ نبی کریم صلی اللہ علیہ وآلہ وسلم نے اصحمہ نجاشی کی نماز جنازہ ادا کی اور اس پر چار تکبیریں پڑھیں۔

حضرت ابن سیرین سے مروی ہے کہ نبی کریم صلی اللہ علیہ وآلہ وسلم نے نجاشی کی نماز جنازہ ادا فرمائی اور حسن فرماتے ہیں اس کے لیے دعا فرمائی۔