مصنف ابن ابي شيبه

حضرت عبد اللہ بن حارث سے مروی ہے کہ نبی کریم صلی اللہ علیہ وآلہ وسلم نے حضرت حمزہ کی نماز جنازہ پڑھائی تو نو (٩) تکبیریں پڑھیں۔ پھر دوسرا جنازہ لایا گیا تو آپ صلی اللہ علیہ وآلہ وسلم نے سات تکبیریں پڑھیں۔ پھر دوسرا جنازہ لایا گیا تو آپ نے پانچ تکبیریں پڑھیں۔ یہاں تک کہ آپ سب جنازوں سے فارغ ہوگئے۔ آپ صلی اللہ علیہ وآلہ وسلم نے ہر جنازے پر طاق تکبیریں پڑھیں۔

حضرت موسیٰ بن عبد اللہ بن یزید فرماتے ہیں کہ حضرت علی رضی اللہ عنہ کرم اللہ وجہہ نے حضرت قتادہ کی نماز جنازہ پڑھائی اور اس میں سات تکبیریں پڑھیں۔

ابراہیم فرماتے ہیں کہ سات تکبیروں سے زیادہ اور چار تکبیروں سے کم نہیں کہی جائیں گی۔

حضرت ابو مالک سے مروی ہے کہ نبی کریم صلی اللہ علیہ وآلہ وسلم نے حضرت حمزہ کی نماز جنازہ پڑھائی، صحابہ کرام جنازوں کو آپ صلی اللہ علیہ وآلہ وسلم کے سامنے سے اٹھا رہے تھے جبکہ حضرت حمزہ کا جنازہ (ہر دفعہ) آپ صلی اللہ علیہ وآلہ وسلم کے سامنے رہا۔ یہاں تک کہ آپ سب جنازوں سے فارغ ہوگئے۔

حضرت ابو مالک فرماتے ہیں کہ نبی کریم صلی اللہ علیہ وآلہ وسلم نے حضرت حمزہ کی نماز جنازہ اس طرح پڑھائی کہ ان کے ساتھ نو جنازے اور رکھے جاتے (نماز جنازہ کے بعد) وہ نو اٹھا لیے جاتے اور حضرت حمزہ کا جنازہ وہیں رہتا پھر نو اور جنازے لائے جاتے، اسی طرح ہوتا رہا یہاں تک کہ حضور صلی اللہ علیہ وآلہ وسلم تمام جنازوں سے فارغ ہوگئے۔

حضرت امام شعبی فرماتے ہیں کہ حضرت علی رضی اللہ عنہ کرم اللہ وجہہ نے حضرت سھل بن حنیف کی نماز جنازہ پڑھائی اور اس میں چھ تکبیریں پڑھیں۔

حضرت بکر ابن عبد اللہ فرماتے ہیں کہ نماز جنازہ میں تین تکبیروں سے کم اور سات سے زائد نہیں کیا جائے گا۔

حضرت عبد اللہ بن معقل سے مروی ہے کہ حضرت علی رضی اللہ عنہ کرم اللہ وجہہ نے حضرت سھل بن حنیف کی نماز جنازہ میں چھ تکبیریں پڑھیں۔

حضرت ابن مغفل سے مروی ہے کہ علی رضی اللہ عنہ نے سہل بن حنیف کے جنازے پر چھ تکبیریں کہیں۔