مصنف ابن ابي شيبه

حضرت سعید بن مسیب فرماتے ہیں کہ حضرت عمر نے روزے کی حالت میں بیوی کا بوسہ لینے سے منع فرمایا ہے۔

حضرت عبید بن عمرو کہتے ہیں کہ ایک آدمی نے حضرت علی رضی اللہ عنہ سے کہا کہ کیا آدمی روزے کی حالت میں اپنی بیوی کا بوسہ لے سکتا ہے یا نہیں ؟ حضرت علی رضی اللہ عنہ نے فرمایا کہ تم اپنی بیوی کے منہ کی بو کا کیا کرو گے ؟

حضرت ہزہاز کہتے ہیں کہ حضرت عبد اللہ بن مسعود رضی اللہ عنہ مقام تمارین میں تھے، ایک آدمی نے ان سے روزے کی حالت میں بوسے کے بارے میں سوال کیا تو انہوں نے فرمایا کہ اس کا روزہ ٹوٹ گیا۔

حضرت ابن عمر رضی اللہ عنہما فرماتے ہیں کہ تم انگارے کا بوسہ کیوں نہیں لے لیتے ؟ !

حضرت مورق کہتے ہیں کہ میں نے حضرت ابن عمر رضی اللہ عنہما سے روزے کی حالت میں بوسے کے بارے میں سوال کیا تو انہوں نے اس سے منع فرمایا۔

حضرت شریح سے روزے کی حالت میں بیوی کا بوسہ لینے کے بارے میں سوال کیا گیا تو انہوں نے فرمایا کہ اللہ سے ڈرے اور ایسا نہ کرے۔

ابراہیم روزہ کی حالت میں بیوی کا بوسہ لینے کو مکروہ قرار دیتے تھے۔

حضرت شیبانی کہتے ہیں کہ میں نے حضرت ابن مغفل سے اس بارے میں سوال کیا تو انہوں نے اسے مکروہ قرار دیا۔

حضرت سعید بن مسیب فرماتے ہیں کہ روزہ کی حالت میں بیوی کا بوسہ لینے سے روزہ ٹوٹتا تو نہیں البتہ ناقص ہوجاتا ہے۔

حضرت ہشام بن غاز فرماتے ہیں کہ ایک نوجوان حضرت مکحول کے پاس آیا اور اس نے کہا کہ میں نے روزہ کی حالت میں بیوی کا بوسہ لیا ہے۔ حضرت مکحول نے فرمایا کہ بیٹا ! میں تو ایسا کرتا ہوں لیکن تم ایسا نہ کرو۔

حضرت شعبی فرماتے ہیں کہ بیوی کا بوسہ لینا وضو کو توڑ دیتا ہے اور روزہ کو زخمی کردیتا ہے۔

حضرت حبیب کہتے ہیں کہ میں نے حضرت ابو قلابہ سے روزہ کی حالت میں بیوی کا بوسہ لینے کے بارے میں سوال کیا تو انہوں نے فرمایا کہ روزہ کی حالت میں بوسہ نہ لو۔

حضرت عبد اللہ سے روزہ کی حالت میں بیوی کا بوسہ لینے کے بارے میں سوال کیا گیا تو انہوں نے فرمایا کہ تم اس کے منہ کی بو کا کیا کرو گے ؟

حضرت ابن عمر رضی اللہ عنہما نے روزہ کی حالت میں بیوی کا بوسہ لینے کو مکروہ قرار دیا ہے۔

حضرت ابن عمر رضی اللہ عنہما فرماتے ہیں کہ حضرت عمر نے اپنا ایک خواب بیان کیا کہ میں خواب میں حضور صلی اللہ علیہ وآلہ وسلم کو دیکھ رہا ہوں لیکن حضور صلی اللہ علیہ وآلہ وسلم مجھے نہیں دیکھ رہے۔ میں نے پوچھا یا رسول اللہ ! آپ مجھے کیوں نہیں دیکھ رہے ؟ آپ نے فرمایا کہ کیا تم روزے کی حالت میں اپنی بیوی کا بوسہ نہیں لیتے ؟ حضرت عمر نے عرض کیا کہ اس ذات کی قسم جس نے آپ کو حق کے ساتھ مبعوث فرمایا ہے، میں آئندہ کبھی ایسا نہیں کروں گا۔

حضرت محمد بن حنفیہ فرماتے ہیں کہ روزہ شہوت سے خراب ہوجاتا ہے اور بوسہ شہوت کا حصہ ہے۔

حضرت ثعلبہ بن عبد اللہ بن ابی صعیر فرماتے ہیں کہ میں نے صحابہ کرام کو دیکھا کہ وہ روزہ کی حالت میں بوسہ لینے سے منع کرتے تھے۔

حضرت میمونہ مولاۃ ال نبی صلی اللہ علیہ وآلہ وسلم روایت کرتی ہیں کہ حضور صلی اللہ علیہ وآلہ وسلم سے سوال کیا گیا کہ ایک روزہ دار نے بوسہ لے لیا ہے ؟ آپ نے فرمایا کہ اس کا روزہ ٹوٹ گیا۔

حضرت مسروق سے روزہ کی حالت میں بوسہ لینے کے بارے میں سوال کیا گیا تو انہوں نے فرمایا رات قریب ہی ہوتی ہے۔