مصنف ابن ابي شيبه

حضرت حکم بن اعرج کہتے ہیں کہ میں حضرت عبد اللہ بن عباس رضی اللہ عنہما کی خدمت میں حاضر ہوا وہ زمزم کے کنویں سے ٹیک لگائے بیٹھتے تھے۔ میں نے کہا کہ مجھے عاشوراء کے روزے کے بارے میں بتائیں۔ انہوں نے فرمایا کہ جب تم محرم کے چاند کو دیکھو تو اس دن کی تیاری شروع کردو۔ پھر نو تاریخ کو روزہ رکھو۔ میں نے کہا کہ کیا حضور صلی اللہ علیہ وآلہ وسلم اس دن روزہ رکھا کرتے تھے ؟ انہوں نے فرمایا ہاں۔

حضرت ابن عباس رضی اللہ عنہما سے روایت ہے کہ رسول اللہ صلی اللہ علیہ وآلہ وسلم نے فرمایا کہ اگر میں اگلے سال تک حیات رہا تو میں نو محرم یعنی یوم عاشوراء کا روزہ رکھوں گا۔

حضرت ابن عباس رضی اللہ عنہما فرماتے ہیں کہ یوم عاشوراء دسویں کی رات اور نویں کی صبح ہے۔

حضرت ضحاک فرماتے ہیں کہ یوم عاشوراء نو محرم ہے۔

حسن اور محمد فرماتے ہیں کہ یوم عاشوراء دس محرم ہے۔

حضرت سعید بن مسیب، حسن اور حضرت عکرمہ فرماتے ہیں کہ یوم عاشوراء دس محرم ہے۔

حسن فرماتے ہیں کہ یوم عاشوراء دس محرم ہے۔

حضرت ابن عباس رضی اللہ عنہما فرماتے ہیں کہ یوم عاشوراء نو محرم ہے۔

حضرت شعبہ فرماتے ہیں کہ حضرت ابن عباس رضی اللہ عنہما سفر میں بھی یوم عاشوراء کا روزہ رکھا کرتے تھے اور اس سے ایک دن پہلے اور ایک دن بعد میں روزہ رکھتے تھے تاکہ عاشوراء کے دن کا روزہ ضائع نہ ہوجائے۔

حسن فرماتے ہیں کہ یوم عاشوراء دس محرم ہے۔