مصنف ابن ابي شيبه

حضرت عباس بن عبدالرحمن ہاشمی فرماتے ہیں کہ مسجدوں میں زعفران سے بنی خوشبو لگانے کی ابتداء اس طرح ہوئی کہ ایک مرتبہ نبی صلی اللہ علیہ وآلہ وسلم نے مسجد میں تھوک گری ہوئی دیکھی، آپ نے اسے صاف کرنے کا حکم دیا اور پھر فرمایا کہ اس پر زعفران سے بنی خوشبو لگادی جائے۔ بس اس کے بعد سے لوگوں نے مسجدوں میں زعفران سے بنی خوشبو لگانا شروع کردی۔

حضرت شعبی فرماتے ہیں کہ نبی صلی اللہ علیہ وآلہ وسلم نے مسجد کے قبلہ کی جانب تھوک گری ہوئی دیکھی تو اسے اپنے ہاتھ سے کھرچ دیا اور زعفران میں ملی ہوئی خوشبو منگوا کر لگائی۔ حضرت عامر فرماتے ہیں کہ مسجدوں میں زعفران سے بنی خوشبولگانا سنت ہے۔

حضرت ابو نجیح فرماتے ہیں کہ حضرت ابن زبیر نے جب کعبہ کی تعمیر کی اس کی دیواروں پر مشک کا پانی چڑھایا۔

حضرت عروہ فرماتے ہیں کہ نبی صلی اللہ علیہ وآلہ وسلم نے گھروں میں مسجدیں بنانے اور انہیں پاک وصاف رکھنے و خوشبودار رکھنے کا حکم دیا۔

حضرت ابن عمر رضی اللہ عنہما فرماتے ہیں کہ حضرت عمر ہر جمعہ کو مسجد مں ق عود کی دھونی دلوایا کرتے تھے۔

سلیمان کہتے ہیں کہ میں نے حضر ت ابراہیم کو مسجد میں زعفران سے ملی خوشبو لگاتے دیکھا ہے، وہ اس میں کوئی حرج نہیں سمجھتے تھے۔

حضرت عائشہ رضی اللہ عنہا فرماتی ہیں کہ نبی صلی اللہ علیہ وآلہ وسلم نے مسجد کے قبلے کی جانب لگی تھوک کو کھر چ دیا تھا۔

حضرت یحییٰ بن کثیر فرماتے ہیں کہ حضرت ابو الدرداء نے مسجد کی دیوار پر تھوک لگی دیکھی تو اسے کھرچ دیا۔