مصنف ابن ابي شيبه

ایک صاحب نے حضرت عائشہ رضی اللہ عنہا کے نام سوال بھیجا کہ کس نماز پر ہمیشگی اختیار کرنا حضور صلی اللہ علیہ وآلہ وسلم کو سب سے زیادہ پسند تھا۔ انہوں نے فرمایا کہ حضور صلی اللہ علیہ وآلہ وسلم ظہر سے پہلے کی چار رکعتوں کو باقاعدگی سے اسی طرح ادا فرماتے کہ ان میں قیام کو لمبا فرماتے اور خوب اچھے طریقے سے رکوع و سجدہ فرماتے ۔

حضرت ابن عمر رضی اللہ عنہما ظہر سے پہلے کی چار رکعتوں کو لمبا کیا کرتے تھے۔

ایک اور سند سے یونہی منقول ہے۔

حضرت حسن بن علی رضی اللہ عنہ ظہر سے پہلے کی چار رکعتوں کو لمبا کر کے پڑھا کرتے تھے۔ حضرت ابن عون فرماتے ہیں کہ اگر وہ تیز قرائت کرتے تھے تو طوال سے پڑھتے تھے اور اگر آہستہ قرائت کرتے تھے تو مئین سے پڑھتے تھے۔

حضرت حذیفہ رضی اللہ عنہ بن اسید کہتے ہیں کہ میں نے حضرت علی رضی اللہ عنہ کو دیکھا کہ انہوں نے سورج کے زائل ہونے کے بعد چار لمبی رکعات ادا فرمائیں۔

عبد الرحمن بن بدیل فرماتے ہیں کہ مجھے حضرت عبد اللہ کے احوال کے سب سے زیادہ واقف شخص نے بتایا ہے کہ وہ زوال شمس کے بعد اپنے گھر میں چار لمبی رکعات ادا فرماتے تھے، پھر جب مؤذن اذان دیتے تو وہ باہر تشریف لے آتے اور مسجد میں نماز کے کھڑے ہونے تک بیٹھے رہتے۔

حضرت عمر نے ظہر سے پہلے کی چار رکعتوں میں سورة ق کی تلاوت فرمائی۔