مصنف ابن ابي شيبه

حضرت ابوہریرہ فرماتے ہیں کہ ہم نے رسول اللہ حضور صلی اللہ علیہ وآلہ وسلم کے ساتھ سورة الانشقاق اور سورة العلق میں سجدہ کیا ہے۔

حضرت ابوہریرہ فرماتے ہیں کہ رسول اللہ حضور صلی اللہ علیہ وآلہ وسلم نے سورة الانشقاق میں سجدہ فرمایا۔

حضرت ابو رافع کہتے ہیں کہ میں نے حضرت ابوہریرہ کے ساتھ مدینہ میں عشاء کی نماز پڑھی۔ انہوں نے اس میں سورة الانشقاق کی تلاوت کی اور اس میں سجدہ کیا۔ میں نے ان سے سوال کیا کہ آپ اس سورت میں سجدہ کیوں کرتے ہیں ؟ انہوں نے فرمایا کہ میں نے اپنے خلیل ابو القاسم حضور صلی اللہ علیہ وآلہ وسلم کو ایسا کرتے دیکھا تھا اس کے بعد سے میں بھی یونہی کرتا ہوں۔

حضرت عبدا للہ فرماتے ہیں کہ رسول اللہ حضور صلی اللہ علیہ وآلہ وسلم نے سورة النجم میں سجدہ کیا تو سب لوگوں نے سجدہ کیا۔ البتہ ایک بوڑھے نے مٹی کی ایک مٹھی لے کر اسے اپنی پیشانی تک بلند کرلیا۔ حضرت عبد اللہ فرماتے ہیں کہ میں نے دیکھا کہ وہ کفر حالت میں مرا۔

حضرت ابو رافع صائغ کہتے ہیں کہ حضرت عمر نے ہمیں عشاء کی نماز پڑھائی۔ انہوں نے پہلی دو رکعتوں میں سے ایک رکعت میں سورة الانشقاق کی تلاوت کی اور اس میں انہوں نے سجدہ کیا۔ ہم نے بھی ان کے ساتھ سجدہ کیا۔

حضرت اسود فرماتے ہیں کہ میں نے حضرت عمر اور حضرت عبداللہ دونوں کو یا دونوں میں سے ایک کو دیکھا کہ انہوں نے سورة الانشقاق میں سجدہ کیا۔

حضرت عبد اللہ بن مسعود رضی اللہ عنہ سورة الانشقاق میں سجدہ کیا کرتے تھے۔

حضرت ابو العالیہ فرماتے ہیں کہ سورة النجم کی تلاوت میں حضور حضور صلی اللہ علیہ وآلہ وسلم اور مسلمانوں نے سجدہ کیا۔

حضرت عبد اللہ بن مسعود رضی اللہ عنہ سورة الاعراف، سورة بنی اسرائیل، سورة النجم اور سورة العلق میں سجدہ کیا کرتے تھے۔

حضرت عبد اللہ نے سورة النجم اور سورة العلق میں سجدہ فرمایا۔

حضرت زر فرماتے ہیں کہ اعلیٰ سجدے سورة الم تنزیل، سورة حم تنزیل، سورة النجم اور سورة العلق کے ہیں۔

حضرت شعبی فرماتے ہیں کہ حضور صلی اللہ علیہ وآلہ وسلم نے سورة النجم کی تلاوت فرمائی اور مسلمانوں، مشرکین، جنات اور انسانوں نے سجدہ کیا۔

حضرت قسامہ بن زہیر سورة النجم اور سورة الانشقاق میں سجدہ کیا کرتے تھے۔

حضرت سلیمان بن حبیب کہتے ہیں کہ میں نے حضرت عمر بن عبد العزیز کے ساتھ سورة الانشقاق میں سجدہ کیا ہے۔

حضرت حسن بن عبید اللہ کہتے ہیں کہ میں نے ابراہیم کو سورة الانشقاق میں سجدہ کرتے دیکھا ہے۔

حضرت نافع فرماتے ہیں کہ حضرت ابن عمر رضی اللہ عنہما سورة النجم اور سورة العلق میں سجدہ کیا کرتے تھے۔ البتہ اگر انہیں فرض نماز میں پڑھتے تو ان میں سجدہ نہیں کرتے تھے اور رکوع کرلیتے تھے۔

حضرت ابن عون کہتے ہیں کہ محمد نے سورة الانشقاق کی تلاوت کی اور پھر اس میں سجدہ کیا۔ حالانکہ میں بیٹھا تھا۔

حضرت زر کہتے ہیں کہ حضرت عمار نے منبر پر سورة الانشقاق پڑھی۔ پھر زمین پر اتر کر سجدہ کیا۔

حضرت مسروق بن اجدع کہتے ہیں کہ حضرت عثمان نے عشاء کی نماز میں سورة النجم پڑھی اور سجدہ کیا۔

حضرت ابوہریرہ فرماتے ہیں کہ نبی پاک حضور صلی اللہ علیہ وآلہ وسلم نے اور مسلمانوں نے سورة النجم کی تلاوت پر سجدہ کیا۔ البتہ قریش کے دو آدمیوں نے شہرت کی غرض سے سجدہ نہ کیا۔

حضرت اسود فرماتے ہیں کہ میں نے حضرت عبداللہ کو سورة الانشقاق میں سجدہ کرتے دیکھا ہے۔