مصنف ابن ابي شيبه

حضرت طلحہ کے دادا روایت کرتے ہیں میں نے رسول اللہ صلی اللہ علیہ وآلہ وسلم کو اس طرح سر کا مسح کرتے ہوئے دیکھا۔ یہ کہہ کر حضرت حفص نے دونوں ہاتھ سر پر پھیرے اور گردن کا بھی مسح کیا۔

حضرت سہل بن یوسف کہتے ہیں کہ میں نے حضرت حمید سے پوچھا کہ کیا حضرت انس بن مالک رضی اللہ عنہ سر کا مسح کرتے وقت بالوں کو الٹ پلٹ کیا کرتے تھے ؟ انہوں نے فرمایا نہیں۔

حضرت ہشام بن عروہ فرماتے ہیں کہ ان کے والد حضرت عروہ سر کا مسح یوں کرتے تھے کہ ہاتھوں کو پہلے آگے سے پیچھے پھر پیچھے سے آگے کی طرف پھیرتے تھے۔

حضرت ربیّع فرماتی ہیں کہ نبی کریم صلی اللہ علیہ وآلہ وسلم اکثر ہمارے ہاں تشریف لایا کرتے تھے۔ ایک مرتبہ آپ تشریف لائے تو ہم نے آپ کے لئے وضو کا پانی رکھا۔ آپ نے وضو فرمایا اور سر کا مسح اس طرح کیا کہ ہاتھوں کو پہلے پیچھے کی طرف پھیرا پھر آگے پیشانی کی طرف لے کر آئے۔

ایوب، حضرت نافع کا قول نقل کرتے ہیں کہ حضرت ابن عمر رضی اللہ عنہما یوں سر کا مسح کیا کرتے تھے۔ یہ کہہ کر ایوب نے اپنے ہاتھ سر کے درمیان میں رکھے اور انہیں آگے کی طرف پھیرا۔

حضرت یزید کہتے ہیں کہ حضرت سلمہ سر کے اگلے حصہ کا مسح کیا کرتے تھے۔