المعجم الكبير للطبراني

سیدہ عائشہ رضی اللہ عنہا سے روایت ہے، فرماتی ہیں: اللہ کی قسم! میں نے رسول اللہ ﷺ کو اپنے حجرے کے دروازے پر کھڑے دیکھا جبکہ حبشی مسجد میں نیزوں سے کھیل رہے تھے، اور رسول اللہ ﷺ اپنی چادر سے مجھے چھپائے ہوئے تھے تاکہ میں آپ ﷺ کے دونوں کانوں اور کندھے کے درمیان سے ان کا کھیل دیکھ سکوں۔ پھر آپ ﷺ میری خاطر کھڑے رہتے یہاں تک کہ میں ہی (سیر ہو کر) واپس چلی جاتی۔ تو کم عمر، کھیل کود کی خواہشمند لڑکی کے شوق کا اندازہ لگا لو۔

سیدہ عائشہ رضی اللہ عنہا سے روایت ہے، فرماتی ہیں: میں نے رسول اللہ ﷺ کو اپنے حجرے کے دروازے پر کھڑے دیکھا جبکہ حبشی اپنے نیزوں سے مسجد میں کھیل رہے تھے، اور رسول اللہ ﷺ اپنی چادر سے مجھے چھپائے ہوئے تھے تاکہ میں ان کا کھیل دیکھ سکوں۔ آپ ﷺ میری خاطر کھڑے رہتے یہاں تک کہ میں ہی واپس چلی جاتی۔ تو اے میرے بھانجے! کم عمر، کھیل کود کی خواہشمند لڑکی کے شوق کا اندازہ لگاؤ۔

سیدہ عائشہ رضی اللہ عنہا سے روایت ہے، فرماتی ہیں: نبی کریم ﷺ نے میری ٹھوڑی اپنے کندھے پر رکھ لی تاکہ میں حبشیوں کا نیزہ بازی دیکھ سکوں، یہاں تک کہ میں ہی ان سے (نظر ہٹا کر) واپس جانے والی ہوتی۔