المعجم الكبير للطبراني

سیدنا ابوثعلبہ رضی اللہ عنہ سے روایت ہے کہ رسول اللہ ﷺ نے فرمایا: ”تم میں سے مجھے سب سے زیادہ محبوب اور آخرت میں مجھ سے قریب ترین نشست والے وہ لوگ ہیں جو اخلاق میں سب سے اچھے ہیں، اور تم میں سے مجھے سب سے زیادہ ناپسندیدہ اور آخرت میں مجھ سے سب سے دور وہ لوگ ہیں جو اخلاق میں سب سے برے ہیں: بہت بکواس کرنے والے، زبان سے تصنع کرنے والے اور علم میں تکبر جتانے والے۔“

سیدنا ابوثعلبہ رضی اللہ عنہ سے روایت ہے کہ رسول اللہ ﷺ نے فرمایا: ”اللہ تعالیٰ نے کچھ فرائض مقرر کیے ہیں، انہیں ضائع نہ کرو، اور کچھ چیزوں سے منع کیا ہے، ان کی بے حرمتی نہ کرو، اور کچھ حدود مقرر کی ہیں، ان سے تجاوز نہ کرو، اور کچھ چیزوں کے بارے میں بھولے بغیر خاموشی اختیار کی ہے، ان کے بارے میں کریدنے کی کوشش نہ کرو۔“

سیدنا ابوثعلبہ رضی اللہ عنہ سے روایت ہے کہ نبی کریم ﷺ نے فرمایا: ”اللہ تعالیٰ شعبان کی پندرھویں رات اپنے بندوں کی طرف متوجہ ہوتا ہے، مومنوں کو بخش دیتا ہے اور کافروں کو مہلت دیتا ہے، اور کینہ رکھنے والوں کو ان کے کینے کے ساتھ چھوڑ دیتا ہے یہاں تک کہ وہ اسے چھوڑ دیں۔“