المعجم الكبير للطبراني

محمد بن منکدر اپنے والد سیدنا منکدر رضی اللہ عنہ سے روایت کرتے ہیں کہ رسول اللہ ﷺ نے فرمایا: ”جو شخص بیت اللہ کا سات چکروں میں طواف کرے اور اس میں کوئی لغو بات نہ کرے، تو یہ ایسا ہی ہے جیسے اس نے ایک غلام آزاد کیا۔“

محمد بن منکدر اپنے والد سیدنا منکدر رضی اللہ عنہ سے روایت کرتے ہیں کہ نبی کریم ﷺ ایک رات نکلے، آپ ﷺ نے عشاء کی نماز میں رات کا کچھ حصہ گزرنے تک تاخیر کر دی تھی، اور لوگ مسجد میں انتظار کر رہے تھے، آپ ﷺ نے فرمایا: ”تم کس چیز کا انتظار کر رہے ہو؟“ لوگوں نے عرض کیا: ہم نماز کا انتظار کر رہے ہیں۔ آپ ﷺ نے فرمایا: ”جب تک تم نماز کا انتظار کرتے رہو گے، نماز ہی میں شمار ہوتے رہو گے۔“ پھر فرمایا: ”یہ ایسی نماز ہے جو تم سے پہلے کسی امت نے نہیں پڑھی۔“ پھر آپ ﷺ نے اپنا سر آسمان کی طرف اٹھایا اور فرمایا: ”ستارے آسمان کی حفاظت کا ذریعہ ہیں، اگر ستارے مٹ جائیں تو آسمان کو وہ (آفت) آ پہنچے گی جس کا اسے وعدہ دیا گیا ہے، اور میں اپنے صحابہ کی حفاظت کا ذریعہ ہوں، جب مجھے اٹھا لیا جائے گا تو میرے صحابہ کو وہ (آزمائش) آ پہنچے گی جس کا انہیں وعدہ دیا گیا ہے، اور میرے صحابہ میری امت کی حفاظت کا ذریعہ ہیں، جب میرے صحابہ اٹھا لیے جائیں گے تو میری امت کو وہ (فتنہ) آ پہنچے گا جس کا اسے وعدہ دیا گیا ہے۔“ پھر فرمایا: ”اے بلال! اقامت کہو۔“