المعجم الكبير للطبراني

ابوزید رحمہ اللہ، جو ثعلبہ کے آزاد کردہ غلام تھے، سیدنا معقل بن ابی معقل اسدی رضی اللہ عنہ سے روایت کرتے ہیں - جو رسول اللہ ﷺ کے صحابہ میں سے تھے - کہ رسول اللہ ﷺ نے پاخانہ یا پیشاب کرتے وقت دونوں قبلوں (یعنی بیت اللہ اور بیت المقدس) کی طرف منہ کرنے سے منع فرمایا۔

سیدنا معقل بن ابی معقل اسدی رضی اللہ عنہ سے روایت ہے ”کہ نبی کریم ﷺ نے پاخانہ یا پیشاب کرتے وقت دونوں قبلوں کی طرف منہ کرنے سے منع فرمایا۔“

سیدنا معقل بن ابی معقل رضی اللہ عنہ سے روایت ہے کہ ان کی والدہ زینب رضی اللہ عنہا رسول اللہ ﷺ کے پاس آئیں اور عرض کیا: یا رسول اللہ! ابومعقل نے مجھ سے وعدہ کیا تھا کہ وہ میرے ساتھ ہی حج کریں گے، مگر وہ اپنی سواری پر اکیلے حج کے لیے چلے گئے اور مجھ میں ساتھ جانے کی طاقت نہ تھی، تو میں نے ان سے ان کے کھجوروں کی فصل مانگی، تو انہوں نے کہا: یہ تو میرے اہل و عیال کا رزق ہے۔ اور میں نے ان سے ان کے پاس موجود ایک جوان اونٹ مانگا، تو انہوں نے کہا: یہ اللہ کی راہ میں وقف ہے، میں تمہیں نہیں دے سکتا۔ تو رسول اللہ ﷺ نے فرمایا: ”ابومعقل! ام معقل کیا کہتی ہیں؟“ انہوں نے کہا: وہ سچ کہتی ہیں۔ آپ ﷺ نے فرمایا: ”اسے اپنا جوان اونٹ دے دو، کیونکہ حج بھی اللہ کی راہ ہے۔“ تو انہوں نے اسے اپنا اونٹ دے دیا۔ تو انہوں نے عرض کیا: میں ایک ایسی عورت ہوں جو بیمار اور بوڑھی ہو چکی ہوں، اور مجھے ڈر ہے کہ میں حج نہ کر سکوں گی یہاں تک کہ مر جاؤں، تو کیا کوئی ایسی چیز ہے جو حج کے قائم مقام ہو؟ آپ ﷺ نے فرمایا: ”ہاں، رمضان میں عمرہ کرنا حج کے برابر ہے۔“ تو انہوں نے رمضان میں عمرہ کیا۔