المعجم الكبير للطبراني

سیدنا کعب بن عاصم اشعری رضی اللہ عنہ کہتے ہیں: میں نے رسول اللہ ﷺ کو حجۃ الوداع کے موقع پر ایامِ تشریق کے درمیانی دن خطبہ دیتے سنا، آپ ﷺ فرما رہے تھے: ”کیا یہ دن حرمت والا نہیں؟“ صحابہ نے عرض کیا: کیوں نہیں، اے اللہ کے رسول! آپ ﷺ نے فرمایا: ”تو تمہاری آپس میں حرمت ایسی ہی ہے جیسے تمہارے اس دن کی حرمت۔ کیا میں تمہیں بتاؤں مسلمان کون ہے؟ مسلمان وہ ہے جس کی زبان اور ہاتھ سے دوسرے مسلمان محفوظ رہیں۔ کیا میں تمہیں بتاؤں مومن کون ہے؟ مومن وہ ہے جس پر مسلمان اپنی جانوں اور مالوں کے بارے میں بھروسا کریں۔ اور کیا میں تمہیں بتاؤں مہاجر کون ہے؟ مہاجر وہ ہے جو ان برائیوں کو چھوڑ دے جنہیں اللہ نے اس پر حرام کیا ہے۔ اور ایک مومن دوسرے مومن پر ویسے ہی حرام ہے جیسے یہ دن حرمت والا ہے: اس کا گوشت اس پر حرام ہے کہ اس کی غیبت کر کے کھایا جائے، اس کی عزت اس پر حرام ہے کہ اسے داغدار کیا جائے، اس کا چہرہ اس پر حرام ہے کہ اسے تھپڑ مارا جائے، اسے تکلیف دینا اس پر حرام ہے، اور اسے اس طرح دھکیلنا حرام ہے کہ وہ لڑکھڑا جائے۔“

سیدنا کعب بن عاصم اشعری رضی اللہ عنہ کہتے ہیں: میں نے نبی کریم ﷺ کو عید الاضحی کے درمیانی دن جمرے کے پاس خطبہ دیتے دیکھا۔