المعجم الكبير للطبراني

حسن بصری رحمہ اللہ کہتے ہیں: میں نے سیدنا کعب بن عجرہ رضی اللہ عنہ سے پوچھا: آپ کے بارے میں رخصت کی آیت نازل ہوئی تھی، تو آپ نے کیا کیا؟ انہوں نے فرمایا: ”میں نے ایک بکری ذبح کی۔“

سیدنا کعب بن عجرہ رضی اللہ عنہ کہتے ہیں: رسول اللہ ﷺ ہماری طرف تشریف لائے تو فرمایا: ”میرے بعد تم پر کچھ حکمران مقرر ہوں گے، وہ منبروں پر حکمت کی باتیں کریں گے، لیکن جب اتریں گے تو تم سے (تمہارا حق) چھین لیں گے، اور ان کے دل مردار سے بھی زیادہ بدبودار ہوں گے۔ تو جو ان کے جھوٹ کی تصدیق کرے اور ان کے ظلم پر ان کی مدد کرے، وہ مجھ سے نہیں اور میں اس سے نہیں، اور وہ حوض پر نہیں آئے گا۔ اور جو ان کے جھوٹ کی تصدیق نہ کرے اور ان کے ظلم پر ان کی مدد نہ کرے، وہ مجھ سے ہے اور میں اس سے ہوں، اور وہ حوض پر آئے گا۔“

سیدنا کعب بن عجرہ رضی اللہ عنہ سے روایت ہے کہ رسول اللہ ﷺ نے فرمایا: ”روزہ ڈھال ہے، اور صدقہ گناہ کو اس طرح بجھا دیتا ہے جیسے پانی آگ کو بجھا دیتا ہے۔“

سیدنا کعب بن عجرہ رضی اللہ عنہ سے روایت ہے کہ رسول اللہ ﷺ نے فرمایا: ”اے کعب بن عجرہ! اللہ تمہیں ان حکمرانوں سے پناہ دے جو میرے بعد آئیں گے، جو ان کے پاس جائے اور ان کے جھوٹ کی تصدیق کرے اور ان کے ظلم پر ان کی مدد کرے، وہ مجھ سے نہیں اور میں اس سے نہیں، اور وہ کبھی حوض پر نہیں آئے گا۔“