المعجم الكبير للطبراني

ام حبیبہ بنت عرباض رحمہا اللہ اپنے والد سیدنا عرباض بن ساریہ رضی اللہ عنہ سے روایت کرتی ہیں کہ نبی کریم ﷺ نے خیبر کے دن ہر کچلی والے درندے اور ہر پنجے والے پرندے سے منع فرمایا، اور مجثمہ (باندھ کر نشانہ بنائے جانے والے جانور) سے منع فرمایا، اور اس بات سے منع فرمایا کہ حاملہ (قیدی) عورتوں سے مباشرت کی جائے یہاں تک کہ وہ اپنا حمل وضع کر لیں۔

ام حبیبہ بنت عرباض رحمہا اللہ اپنے والد سے روایت کرتی ہیں کہ رسول اللہ ﷺ نے مال غنیمت میں سے ایک اون کا ٹکڑا اٹھایا اور فرمایا: ”اس میں میرا کوئی حصہ نہیں مگر جتنا تم میں سے کسی ایک کا ہے، سوائے خمس کے، اور وہ بھی تمہیں لوٹا دیا جاتا ہے۔ پس سوئی اور دھاگے تک لوٹا دو، اور مالِ غنیمت میں خیانت سے بچو، کیونکہ یہ عار اور رسوائی ہے۔“

ام حبیبہ بنت عرباض رحمہا اللہ اپنے والد سے روایت کرتی ہیں کہ رسول اللہ ﷺ نے خیبر کے دن پالتو گدھوں سے منع فرمایا۔

اسی سند سے مروی ہے کہ رسول اللہ ﷺ نے خیبر کے دن اچک لینے (خلسہ) سے منع فرمایا۔